Պերմի դպրոցի 4-րդ դասարանի աշակերտները պարապմունքների են եղել, երբ սառը զենքով դասարան են ներխուժել 16-ամյա Լև Բ.-ն և Ալեքսանդր Բ.-ն։ Նրանք հարձակվել են ուսուցչուհու վրա և սկսել դանակով հարվածներ հասցնել երեխաներին։ Շուտով նրանց միջև վեճ է ծագել, ինչի արդյունքում նրանք հարձակվել են միմյանց վրա։ Որոշ տվյալներով՝ նրանցից մեկը եղել է դպրոցի նախկին աշակերտ, մյուսը՝ ներկայիս։
Armenia.IM-ի հաղորդմամբ՝ տուժածների թվում հայ տղայի անուն կա՝ Մենուլա Աբրոյան։
«Մեր որդին այդ դպրոց է գնում առաջին դասարանից։ Մեզ դուր էր գալիս այդ դպրոցը։ Ինչպես պատմել է որդիս՝ մոտավորապես ժամը 9.45 դասարան են մտել երկու տղաներ։ Մեկը վազել է ուսուցչուհու ուղղությամբ և հարվածել նրան դանակով, իսկ հետո անմիջապես մոտեցել որդուս, նա առջևում է նստում։ Որդուս մոտ առկա են գլխամաշկի կտրվածքներ։ Որդիս արագ վեր է կացել և վազել միջանցք, այնուհետև փողոց, հասել Գագարինի ծառուղու պոլիկլինիկա։ Այնտեղ բժիշկները նրան օգնություն են ցուցաբերել։ Այժմ կինս երեխայի հետ հիվանդանոցում է, իսկ ես դուրս եմ եկել աշխատանքից, խանութ գնացել, նրանց մթերք եմ տանում»,-պատմել է Մենուլայի հայրը՝ Արգիշտի Աբրոյանը։