«Հրդեհ և կատաղություն. Թրամփի Սպիտակ տան ներսում» գրքի հրատարակումը նոր տարվա գլխավոր իրադարձությունը դարձավ: Գրքի հեղինակին մեղադրում են կեղծիքի մեջ, նրա որոշ գործընկերներ հրաժեշտ են տվել իրենց կարիերային: Դոնալդ Թրամփը կատաղած է. նրա հակառակորդներն անհանգստացած են: Միակ մարդը, որ անկասկակած շահել է գրքի հրատարակումից, հեղինակն է՝ հանրահայտ, սկանդալային լրագրող Մայքլ Վոլֆը:
Ողջ աշխարհի համար Մայքլ Վոլֆը կրկնեց Ջոան Ռոուլինգի հերոսական արարքը. քնեց և արթնացավ հանրաճանաչ: Իրականում Ամերիկայում Մայքլ Վոլֆը առանց այդ էլ հայտնի էր իր կոմերցիոն հաջողություններով: Այս դեպքում հաջողությունն ավելի քան երաշխավորված էր, քանի որ այն, ինչ գրվում է Թրամփի մասին, արդեն դատապարտված է հաջողության, հատկապես, երբ գրված է շատ, մանրամասն և խելացի:
Գիրքը հագեցած է աղմկահարույց մանրամասներով, որոնք հաստատում են միայն մի բան՝ Դոնալդ Թրամփը սարսափելի նախագահ է, իսկ նրա հետ աշխատող մարդիկ այնքան էլ ուրախ չեն, որ բարձր պաշտոններ են զբաղեցնում:
Մայքլ Վոլֆը շատ ժամանակ է անցկացրել Դոնալդ Թրամփի արդեն նախկին գլխավոր քաղաքական խորհրդական Սթիվեն Բենոնի հետ: Բենոնի մեջբերումները թերևս ամենաաղմկահարույցն են ամբողջ գրքում: Բենոնը դրա համար մեծ գին վճարեց՝ իր կարիերային հրաժեշտ տալով: Իսկ ինչ վերաբերում է հեղինակին, ով պնդում է, որ գիրքը ամբողջովին ճշմարիտ է, «Հրդեհ և կատաղությունը» իր գործն արեց. այն թույլ տվեց հեղինակին հիշեցնել իր մասին և դատելով գրքի վաճառքից՝ նկատելիորեն բարելավեց նրա ֆինանսական վիճակը:
