Պակիստանի Կասուր քաղաքում ցույցեր են սկսվել 11-ամյա աղջկա սպանությունից հետո։ Երկու ցուցարարներ զոհվել են ընդհարումների հետևանքով, հայտնում է BBC-ն։
Հունվարի 9-ին աղբանոցում հայտնաբերվել էր 11-մյա Զայնաբի մարմինը։ Նա անհետացել էր դրանից մեկ շաբաթ առաջ։ Աղջկան բռնաբարել էին ու խեղդամահ արել։
Բողոքի ակցիայի մասնակիցները հայտարարում են, որ իշխանությունները ջանք չեն գործադրում մարդկանց առևանգումների, սեռական բռնության ու սպանությունների ալիքը դադարեցնելու համար։ Ակցիայի ժամանակ ոստիկանությունը սկսել է կրակել բազմության ուղղությամբ, որը փորձել է գրոհել ոստիկանական բաժանմունքի վրա։
Քաղաքային ոստիկանության տվյալներով՝ վերջին 2 տարում 12 նման սպանություն է տեղի ունեցել։ Դրանցից 5-ը կապված են միևնույն կասկածյալի հետ։
Զայնաբի սպանությունն արձագանք է առաջացրել ողջ Պակիստանում։ Երկրում հայտնի դերասանները կոչ են արել գտնել մարդասպանին։
