2018-ը սկսվեց թանկացումներով՝ պայմանավորված Հարկային օրենսգրքում կատարված փոփոխություններով, և հնարավոր է, որ այս ընթացքում թանկանան շուրջ 800 անուն ապրանքատեսակներ:
ԱԺ փոխխոսնակ Միքայել Մելքումյանը «Առաջին լրատվական»-ի հետ զրույցում ասաց, որ այս թանկացումները սպասելի էին. «Մենք այս մասին ոչ միայն ասել ենք, այլև օրենսդրական նախաձեռնություններ էինք շրջանառության մեջ դրել, որոնք այս կամ այն կերպ կարող էին թեթևացնել իրավիճակը»:
Նրա խոսքով՝ իշխանությունը պետք է փորձի զսպել գնաճը կա՛մ թոշակ-աշխատավարձ բարձրացնելով, կա՛մ քաղաացիների հարկային բեռը թեթևացնելով: «Պետք է հասկանալ՝ այդ գնաճը բնականո՞ն էր՝ հարկային բեռի՞ հաշվին էր, թե՞ դրան գումարում են նաև գործարարների եկամուտները»:
Միքայել Մելքումյանը նշեց, որ դիզվառելիքի թանկացումից հատկապես լուրջ խնդիր են ոնենալու գյուղացիական տնտեսությունները, որովհետև դիզվառելիքն այժմ հարկվելու է ավելացված արժեքի հարկով՝ ակցիզայինի փոխարեն. «Բեռը կգնա գյուղացու վրա, և դա կբերի շղթայական տհաճ հետևանքների, որոնց արդյունքում գյուղմթերքների գները կբարձրանան»:
Նրա խոսքով՝ նույնը տեղի է ունենալու հարկային սննդի օբյեկտներում: «Ես և մեր քաղաքական ուժը հակված ենք նրան, որ պետք է գնալ այս սոցիալական լարվածությունը թուլացնելու ճանապարհով»,- ասաց նա:
Հարցին՝ «Ծառուկյան» դաշինքը կմիանա՞ «Ելք»-ի կազմակերպած երթին՝ կապված թանկացումների հետ, Միքայել Մելքումյանը պատասխանեց. «Էդպիսի հարց մենք չենք քննարկել մեր քաղաքական ուժում, առաջին անգամ ես ձեզնից եմ լսում, որ էդպիսի բան է կազմակերպվում»:
