Ձու, կարագ, հնդկահավ, խմորեղեն… արդեն նախորդ տարի արված առևտուրը բավական է, որպեսզի մոռանանք խանութների մասին, մինչդեռ հունվարի 1-ից խանութներում թանկացումներ են:
Մոտ 800 անուն ապրանք կմաքսազերծվի ԵՏՄ-ում գործող միասնական դրույքաչափով, այսինքն՝ մենք դրանք չենք կարողանա ձեռք բերել 2017թ.-ի գնով: Շաքարավազը, կարագը, թռչնամիսը, դեղորայքը արդեն ավելի թանկ արժեն…
Նախկինում մեկ տուփ կարագի գինը տատանվում էր 400-600 դրամի սահմաններում, այսօր կարագը թանկացել է կրկնակի, և, ինչպես ասել էր մեր օրերի մեծերից մեկը, թե բա՝ «միջինից ցածր խավը, միևնույն է, կարագ չի գնում», կարծում եմ՝ հարցի լուծում չէ: Թռչնամսի ներմուծումը թանկացել է 4%-ով, իսկ դեղագործական որոշ տեսակների ներմուծումը՝ 2%-ով. դե հիմա պատկերացրեք, թե որքան են թանկացել արդեն այս անուն ապրանքատեսակները:
Բենզինը թանկացավ, մարդիկ մեքենաների վրա գազ տեղադրեցին, հիմա պետք է նոր բան մտածել, քանի որ գազն էլ թանկացավ… Այստեղ էլ տեղին է հիշել հայկական հումորներից մեկը, որի համաձայն՝ Հայաստանում խոտը մի օր թանկանում է, ավանակի վրա գազ են տեղադրում, բայց դա այն ժամանակների մասին էր, որովհետև գազը արդեն թանկ հաճույք է:
Հունվարի մեկից Հարկային նոր օրենսգրքի ուժի մեջ մտնելու արդյունքում մի քանի ապրանքատեսակներ էլ թանկացան ակցիզային հարկի դրույքաչափի բարձրացման հետևանքով:
