Կոտայքի մարզի ընդհանուր իրավասության դատարանում Վարդան Ստեփանյանի նախագահությամբ ավարտվել է Լենա Մ.-ի (անունը փոխված է) գործի դատական քննությունը:
2017 թվականի մայիսի15-ին, ժամը 15-ն անց 10-ի սահմաններում Հրազդան քաղաքի Շահումյան փողոցի 10-րդ հասցեում գտնվող՝ Կոտայքի գազիֆիկացման և գազամատակարարման մասնաճյուղի դիմացի կանաչապատ հատվածում՝ խոտերի վրա, թղթե արկղի մեջ՝ պոլիէթիլենային տոպրակով փաթեթավորված՝ հայտնաբերվել է նորածին երեխայի դի:
Օրեր անց՝ մայիսի 23-ին, ոստիկանության բաժին բերման է ենթարկվել Հրազդանի 40-ամյա բնակչուհի Լենան:
Վերջինս խոստովանական ցուցմունք է տվել, որ 2017 թվականի մայիսի 11-ի առավոտյան իր բնակարանի լողասենյակում առանց բժշկական միջամտության ծննդաբերել է արական սեռի երեխա, ով առաջին ճիչն արձակել ու… մահացել է…
Նույն օրն ինքը նորածնի դին փաթեթավորել է պալիէթիլենային տոպրակով, դրել է թղթե արկղի մեջ, տեղափոխել է Շահումյան փողոցին հարակից անտառային կանաչապատ տարածք, դրել է խոտերի մեջ ու հեռացել է:
Լենան ամուսնալուծված է, նրա խնամքին 2 անչափահաս երեխաներ կան:
Նախաքննական մարմինը Լենա Մ.-ին մեղադրանք է առաջադրել ՀՀ քրեական օրենսգրքի 106 հոդվածով՝ մոր կողմից նորածին երեխայի սպանությունը:
Ըստ մեղադրանքի՝ 2017 թվականի մայիսի 11-ին, ժամը 10-ի սահմաններում Լենա Մ.-ն իր բնակարանի լոգարանի զուգարանակոնքին նստած՝ առանց բժշկական միջամտության ու որևէ մեկի օգնության ծննդաբերել է արական սեռի երեխա:
Երեխան ճչացել է, մայրը համոզված է եղել, որ երեխան ողջ է: Սակայն երեխային կյանքից զրկելու դիտավորությամբ՝ ծննդաբերությունից անմիջապես հետո գտնվելով խիստ հուզմունքի ու տրավմատիկ վիճակում, Լենան նորածնին մեկ ժամից ավելի անօգնական, առանց խնամքի ու կերակրելու թողել է լոգարանի զուգարանակոնքի մեջ: Նորածինը մեխանիկական շնչահեղձության՝ շնչառական ուղիները օտար մարմիններով՝ հեղուկով, այդ թվում և՝ պտղաջրերով փակվելու հետևանքով մահացել է:
2-3 օր անց ստվարաթղթե արկղով նորածնի դին Լենան տեղափոխել է Շահումյան փողոցին հարակից անտառապատ տարածք, արկղը դրել է թփերի մեջ ու հեռացել է:
Մեղսագրված արարքի համար Լենան իրեն մեղավոր է ճանաչել, զղջացել է:
Գործը քննվել է արագացված ընթացակարգով:
Ըստ ամբուլատոր դատահոգեբուժական-դատահոգեբանական համալիր փորձաքննության եզրակացության՝ Լենա Մ.-ն հոգեկան հիվանդությամբ չի տառապել ու չի տառապում, նա ճանաչվել է մեղսունակ:
Իրավախախտումը կատարելու պահին հաշիվ է տվել իր գործողություններին, դրանք ղեկավարել է: Արարքը կատարելու պահին Լենա Մ.-ն գտնվել է «խիստ հուզմունքի ու տրավմատիկ հոգեվիճակում, որը էական կազմալուծող ազդեցություն չի ունեցել նրա հոգեկան գործունեության վրա, ինչն արտահայտվել է վարքի ու գործողությունների նպատակաուղղվածությամբ, դրանց գիտակցական վերահսկողության հարաբերական պահպանմամբ»:
Դատարանը հաշվի է առել, որ Լենայի խնամքին են երկու անչափահաս երեխաները՝ 15 և 14 տարեկան:
Դատարանն արձանագրել է, որ Լենա Մ.-ին մեղադրանք է առաջադրվել ՀՀ քրեական օրենսգրքի 106 հոդվածով՝ «մոր կողմից ծննդաբերության ժամանակ կամ դրանից անմիջապես հետո, ինչպես նաև հոգեճնշող վիճակում կամ մեղսունակությունը չբացառող հոգեկան խանգարման վիճակում նորածին երեխայի սպանությունը»:
Դա համարվում է դիտավորությամբ կատարվող միջին ծանրության հանցագործություն, որի համար օրենքով նախատեսված է միայն ազատազրկման ձևով պատիժ, առավելագույնը՝ 5 տարի ժամկետով:
Դատարանը Լենա Մ.-ին մեղավոր է ճանաչել ՀՀ քրեական օրենսգրքի 106 հոդվածով և դատապարտել է 1 տարի 6 ամիս իրական ազատազրկման:
Պատժի սկիզբը կհաշվվի Լենա Մ.-ին փաստացի կալանքի տակ առնելու պահից, եթե դատավճիռը օրինական ուժի մեջ մտնի:
