Evlilikci.com պլատֆորմը պարծենում է, որ դա Թուրքիայում առաջին նմանատիպ ծառայությունն է և երրորդը աշխարհում՝ Մեծ Բրիտանիայի և Ինդոնեզիայի համանման նախագծերից հետո:.
Պորտալը նախատեսված է տղամարդկանց և կանանց համար, որոնք ցանկանում են բավարարել իրենց սեքսուալ պահանջմունքները՝ միաժամանակ «չվառվելով», ինչպես նաև նրանց համար, ովքեր ցանկանում են իրենց համար գտնել ամուսնացած կին կամ տղամարդ:
Թուրքիայի Կանանց միավորման ֆեդերացիան (TKFD) դատախազությանը գանգատվել է պլատֆորմից. «Այդ կայքը օգտագործում է կանանց մարմինը, որպեսզի գործի դնի գենդերային խտրականություն՝ դրա համար կիրառելով կրոնական ծեսեր»,- նշվել է TKFD-ի հայտարարության մեջ:
Տեղեկատվության և հաղորդակցության վերահսկողության թուրքական ծառայության որոշմամբ կայքը փակվել է, բայց դա այդ տեսակի միակ պլատֆորմը չէ: Համանման ծառայություններ են տրամադրում, օրինակ, Second Wife և «Սիրիացի կանայք» ծառայությունները: Սիրիացի կանայք Թուրքիա են փախչում պատերազմի պատճառով: «Պատերազմի պատճառով այս կանանց հոգեկան աշխարհը վնասվել է, ամուսնանալը նրանց համար օգտակար է: Դուք կարող եք աջակցել այս կանանց, որպեսզի իրենք իրենց լավ զգան»,- ասվում է կայքում:
Շանլըուրֆայի բնակչուհին, որն անվտանգությունից ելնելով չի հայտնել իր անունը, ասել է, որ ամուսիններն ավելի հաճախ են կանանց սպառնում դժգոհության կամ կոնֆլիկտի դեպքում «իրենց կին բերել Սիրիայից». «Եթե քեզ վատ պահես, երկրորդ կին կբերեմ Սիրիայից»:
Նրա խոսքով՝ փոխվել է ֆինանսական մոտեցումը բազմակնության հանդեպ: «Նախկինում երկրորդ անգամ ամուսնանում էին առաջին հերթին հարուստները: Դրա համար պետք էր ունենալ համապատասխան կարողություն: Իսկ այժմ ավելի հեշտ է. երկրորդ կին կարող է ունենալ ցանկացած մեկը»,- ասել է DW-ի զրուցակցուհին:
