Forbes ամսագիրը կազմել է տարվա ամենահաջողակ միլիարդատերերի ավանդական ցուցակը, որում հայտնվել են նրանք, ովքեր 12 ամիսների ընթացքում իրենց կարողությունն ամենից շատն են մեծացրել։ Forbes-ը վերլուծել է ավելի քան 2000 միլիարդատերերի ակտիվները հունվարի 1-ից մինչ դեկտեմբերի 14-ը։ Նրանցից 10 ամենահաջողակները մեծացրել են իրենց կարողությունը 204 մլրդ դոլարով։ Համեմատության համար նշենք, որ 2016 թվականին այդ ցուցանիշը եղել է զգալի քիչ՝ 74.7 մլրդ դոլար։
Ցուցակը գլխավորել է Amazon ընկերության հիմնադիր Ջեֆ Բեզոսը, ով 2017 թվականին դարձել է աշխարհի ամենահարուստ մարդը։ Նրան հաջողվել է իր կարողությունն ավելացնել 33.8 մլրդ դոլարով՝ հասցնելով 98.6 մլրդ դոլարի՝ շնորհիվ իր ընկերության բաժնետոմսերի ռեկորդային աճի, դրանք տարեսկզբից թանկացել են 60 տոկոսով։
Երկրորդ տեղում է չինացի դեվելոփեր Հուեյ Կա Յանը, ում կարողությունը պարբերականը գնահատում է 36.5 մլրդ դոլար։ Իր գումարի մեծ մասը՝ 27.4 մլրդ դոլարը, նա աշխատել է հենց այս տարի։ Միլիարդատիրոջն օգնել է նաև իր ընկերության բաժնետոմսերի գնի աճը։ Evergrande-ի բաժնետոմսերի արժեքը բարձրացել է 400 տոկոսով։ Այն վերահսկում է կոմերցիոն և բնակելի անշարժ գույքի շուկան չինական ավելի քան 200 քաղաքներում։
LVMH-ի (Louis Vuitton Moet Hennessy) սեփականատեր Բեռնար Առնոյի կարողությունն աճել է ավելի քան կրկնակի՝ հասնելով 40.3 մլրդ դոլարի (+23.6 մլրդ դոլար), ինչը նրա համար ապահովել է տարվա ամենահաջողակ միլիարդատերերի վարկանիշի երրորդ հորիզոնականը։
Տարին բարեհաջող է եղել նաև տեխնոլոգիական ընկերությունների սեփականատերերի՝ Facebook-ի հիմնադիր Մարկ Ցուկերբերգի (+23,6 մլրդ դոլար) և Tencent-ի նախագահ Մա Հուաթենի համար (+21,8 մլրդ դոլար)։ Նրանք զբաղեցնում են համապատասխանաբար 4-րդ և 5-րդ հորիզոնականները։
Միակ կինը վարկանիշում Country Garden Holdings-ի բաժնետեր Յան Հուեյանն է, ով զբաղեցրել է 8-րդ հորիզոնականը (+14,8 մլրդ դոլար)։
