Փոփոխված Սահմանադրության 125-րդ հոդվածի III կետը նախատեսում է՝ «Հանրապետության նախագահի թեկնածու առաջադրելու իրավունք ունի պատգամավորների ընդհանուր թվի առնվազն 1/4-ը»։ ԱԺ-ում 1/4 ունեն միայն երկու խմբակցություն՝ ՀՀԿ-ն և «Ծառուկյան» դաշինքը։
Մամուլում տեղեկություններ հայտնվեցին, որ նախագահի միասնական թեկնածուով հանդես գալու առաջարկով «Ծառուկյան» դաշինքի հետ խոսակցություններ է սկսել նաև «Ելք» խմբակցությունը՝ պատրաստակամություն հայտնելով պաշտպանել «Ծառուկյան» դաշինքի կողմից առաջադրվելիք թեկնածուին։
«Առաջին լրատվական»-ի հետ զրույցում «Ծառուկյան» դաշինքի ներկայացուցիչ, ԱԺ փոխխոսնակ Միքայել Մելքումյանը ընդգծեց, որ այդպիսի բանակցությունների մասին տեղյակ չէ։ «Ես ինձ առանցքային գործիչ եմ համարում «Ծառուկյան» դաշինքում. չգիտեմ, որ ժանրից է։ Գետը չմտած՝ պետք չէ բոբիկանալ, դուք անընդհատ ուզում եք առաջ անցնել, կգա ժամանակը, ամեն ինչ կիմանաք»,- շեշտեց նա։
Անդրադառնալով խորհրդարնում քննարկվող Հարկային օրենսգրքի փոխոխություններին՝ Միքայել Մելքումյանն ասաց. «Մեսիջը, քաղաքական դրույթը այն է, որ դեռևս նոր Հարկային օրենսգիրքը ուժի մեջ չմտած՝ կառավարությունը նախաձեռնեց արմատական փոփոխություններ, այսինքն՝ էն, ինչ որ 9-10 ամիս մենք զգուշացնում էինք, բերեցին, երբ փոփոխություններ են մտցնում։ Հլը ուժի մեջ չի մտել, որ տեսնենք էդ օրենսգրքի ազդեցությունները։ Սա նշանակում է, որ օրենսգրքերի, օրենքների մշակման պրակտիկան, տեսությունը, տրամաբանությունը և բովանդակությունը էապես չեն բավարարում, որակը չի բավարարում։ Հարկային օրենսգիրքը բիզնեսի սահմանադրություն է, խաղի կանոնները երկար ժամանակի համար են նախատեսված։ Հիմա անընդհատ՝ 6 ամիսը մեկ պիտի փոխե՞ս. համոզված եմ՝ 6 ամիս հետո էլի են բերելու, որ փոխես»,- ընդգծեց նա։
Մանրամասները՝ տեսանյութում:
