Արցախի ու Հայաստանի Հանրապետության միջև առկա ռազմական համագործակցության, ինչպես նաև փոխադարձ օգնության շրջանակներում Արցախի Հանրապետությունում դեկտեմբերի 1-ին և 2-ին անցկացվեցին մեծամասշտաբ ու նախադեպը չունեցող զորավարժություններ, որին մասնակցում էին նաև հայաստանյան տարբեր ԶԼՄ-ների ներկայացուցիչներ։
Ռազմական գիտելիքներ, հմտություններ ու պատերազմական իրավիճակը լուսաբանելու փորձ ձեռք բերելու համար Արցախ այցելած լրագրողները մի քանի օր անցկացրեցին առաջնագծում՝ գործնականում ծանոթանալով զորավարժությունների ողջ ընթացքին։ ՊՆ ներկայացուչիցները տեղեկացրին, որ ըստ զորավարժության սցենարի՝ հակառակորդը ճեղքել է հայկական կողմի առաջնագիծը և վերջինս էլ սկսում է կասեցնել հակառակորդի առաջխաղացումը:
«Ես կարծում եմ, որ լրագրողների աշխատանքը մարտական իրավիճակներում շատ կարևոր է․ կարևոր է, թե դու որպես լրագրող ինչ ես փոխանցում հանրությանը, որը այդ օրերին նստած սպասում է իմանալու, թե ինչ է կատարվում առաջնագծում և այդ պարագայում լրագրողի ճիշտ աշխատանքը, ճիշտ լուսաբանումն առաջնագծից շատ կարևոր հանգամանք է։ Այս զորավարժությունները գործնական առումով ավելի պրոֆեսիոնալ կդարձնեն լրագրողների աշխատանքը նման իրավիճակներում»,- «Առաջին լրատվական»-ի հետ զրույցում նշեց լրագրող Մկրտիչ Իսրայելյանը։
Լրագրող Նարինե Իրիցյանն էլ իր հերթին հավելեց․«Մի բան է տեսական գիտելիքներ ունենալը, մեկ այլ բան՝ այդ գիտելիքներն, այսպես կոչված, պայմանական պատերազմի պայմաններում իրացնելը։ Զորավարժություններին լրագրողների մասնակցությունը կարևոր է նրանով, որպեսզի մենք հասկանանք, որ կան իրավիճակներ, կան դետալներ, կան կադրեր, որոնք չպետք է անենք՝ մեր բանակի, մեր զինվորների անվտանգության տեսանկյունից ելնելով։ Երբ որ դու ռազմի դաշտում ես՝ շատ կարևոր է արագ կողմնորոշվելը, իրավիճակը ճիշտ գնահատելը և ըստ այդմ՝ քո լրագրողական մասնագիտական հմտությունները կիրառելը»։
Մանրամասները՝ տեսանյութում։
