«Կարգապահական վարույթ հարուցվում է առիթի և հիմքի դեպքում։ Առիթը քաղաքացու բողոքն է կամ ԶԼՄ հրապարակումը, իսկ հիմքը՝ փաստաբանի արարքում հնարավոր խախտման բնույթը»,- ի պատասխան «Առաջին լրատվական»-ի հարցի՝ ասաց Փաստաբանների պալատի նախագահ Արա Զոհրաբյանը՝ անդրադառնալով վերջին շրջանում փաստաբանների նկատմամբ կարգապահական վարույթներին ու որոշումներին, մասնավորապես՝ Վահե Գրիգորյանի և նախօրեին Մուշեղ Շուշանյանի նկատմամբ կայացված որոշումներին։
Արա Զոհրաբյանի խոսքով՝ Վահե Գրիգորյանը փաստաբաններից մեկի հասցեին վիրավորական արտահայտություն է հնչեցրել, փաստաբանն էլ դիմել է վարույթ հարուցելու համար։ «Հիմա դուք ասեք՝ ես ի՞նչ անեի, փաստաբանի բողոքը մերժեի, ասեի՝ վիրավորական չի՞։ Վահե Գրիգորյանն ասել էր՝ այդ մարդը տառապում է կրետինիզմով։ Եթե կարծում եք, որ դա վիրավորանք չէ, ապա մենք լրիվ սխալ ենք պատկերացնում ամեն ինչ»,- ասաց Զոհրաբյանը։
Մեր դիտարկմանը, թե Մուշեղ Շուշանյանի նկատմամբ կարգապահական վարույթը որքանով է հիմնավոր, նա ընդամենն ասել էր՝ «խայտառակություն» և «իրավական անգրագիտություն», Զոհրաբյանը նկատեց. «Տեսեք, եթե փաստաբանը վարկաբեկում է իր համայնքը, իր համայնքի հեղինակությունը կասկածի տակ է դնում, նա դրանով լրացուցիչ իրեն է վնասում և մյուս փաստաբաններին։ Մուշեղ Շուշանյանը չի կարող խորհրդի որոշմանը նման գնահատական տալ։ Երբ ասում է, որ այդ որոշումը անգրագետ որոշում է, նշանակում է՝ նա ասում է, որ իր կոլեգաները գրագետ չեն»,- ասաց ՓՊ նախագահը։
Ինչ վերաբերում է Փաստաբանների պալատի կողմից Վահե Գրիգորյանի վերապատրաստման վերաբերյալ մեր հարցին, Զոհրաբյանը արձագանքեց. «Չի կարելի լինել կռապաշտ։ Չի կարելի մարդուն կուռք սարքել։ Վահե Գրիգորյանը շատ գրագետ անձնավորություն է։ Բայց ցանկացած մարդ, ցանկացած սուպերփաստաբան իր գիտելիքները կատարելագործելու պարտականություն ունի»։
