Սահմանադրական դատարանի՝ Վանաձորի ավագանու գումարած բոլոր նիստերը հակասահմանադրական ճանաչելուց հետո սահմանադրագետները նշում են, որ Վանաձորի ավագանու լիազորությունները պետք է դադարեցվեն, և նոր ընտրություններ նշանակվեն, քանի որ ներկայիս ավագանին չգործող մարմին է արդեն։ ԱԺ ՀՀԿ խմբակցության ղեկավար Վահրամ Բաղդասարյանն էլ, թեև Սահմանադրական դատարանի որոշումը շատ նորմալ և օբյեկտիվ է համարում, սակայն նշում է, որ դա չի վերաբերում քաղաքապետարանի կամ ավագանու կատարած գործունեությանը, նրանք հակասահմանադրական որևէ քայլ չեն կատարել։ Այստեղ, նրա խոսքով, հակասություն կա օրենքի և Սահմանադրության միջև, և մինչև մարտի 31-ը այդ խոչընդոտները պետք է հարթվեն։
Մինչ այդ Վանաձորի ավագանին նոյեմբերի 23-ին ավագանու նիստ կգումարի։ Ըստ շրջանառվող լուրերի՝ այս ընթացքում Մամիկոն Ասլանյանին հաջողվել է համոզել Վանաձորի՝ ՏԻՄ ընտրություններում «Հայկական վերածնունդ» կուսակցության ցուցակը գլխավորած թեկնածու Արկադի Փելեշյանին մասնակցել ավագանու նիստերին, փոխարենը նրան առաջարկվել է փոխքաղաքապետի պաշտոնը։
ՀՎԿ փոխնախագահ Հեղինե Բիշարյանը «Առաջին լրատվական»-ի հետ զրույցում նշեց, որ Վանաձորի ավագանու շուրջ ստեղծված իրավիճակին չեն անդրադարձել։ Նրա կարծիքով՝ խնդիրը, որն առկախված է, պետք է մի օր պարտադիր լուծում ստանա. «Թե ինչպիսի լուծում, այդ մասին էլ չեմ մտածել»։
Անդրադառնալով Արկադի Փելեշյանի՝ փոխքաղաքապետ դառնալու մասին շրջանառվող լուրերին՝ նա նշեց, որ այս հարցը նույնպես չեն քննարկել. «Ես այդ հարցին չեմ կարող պատասխանել»։
Վանաձորի քաղաքապետ Մամիկոն Ասլանյանից հետաքրքրվեցինք՝ արդյոք այս օրերին ՀՎԿ և մյուս ավագանիների հետ փորձո՞ւմ է պայմանավորվել: Նա նշեց, որ իրենք հիմա իրենց առօրյա աշխատանքով են զբաղված։ «Նոյեմբերի 23-ին նիստ ենք նշանակել, նոյեմբերի 23-ին կերևա՝ ինչ ենք անում»,- ասաց Մամիկոն Ասլանյանը՝ հավելելով, որ ամեն ամիս իրենք պարտավոր են նիստ գումարել։ Իսկ այն, որ ՍԴ-ն հակասահմանադրական է ճանաչել ավագանու որոշումները, Մամիկոն Ասլանյանը նշեց, որ ՏԻՄ օրենքը այս պահին որևէ մեկը չի վերացրել։ Նրա խոսքով՝ առանց ՏԻՄ օրենքի որևէ տեղական ինքնակառավարման մարմին չի կարող գործել։
«Սահմանադրական դատարանը դրա համար ժամկետ է տվել մինչև մարտի 31-ը, հետևաբար այդ ընթացքում մենք պարտավոր ենք նիստեր հրավիրել, իսկ կկայանա նիստը, թե ոչ՝ այլ խնդիր է, դա երևում է հենց նիստի գումարման օրը»,- ասաց քաղաքապետը։
Ինչ վերաբերում է Արկադի Փելեշյանի հետ պայմանավորվածություն ձեռք բերելուն, ապա, նրա խոսքով, որևէ մեկի հետ բանակցություն կամ պայմանավորվածություն չկա: «Այս պահին մենք մեր սովորական առօրյա գործունեությամբ ենք զբաղված»,- ասաց նա։
Հարցին՝ արդյոք փոխքաղաքապետ կառաջարկի՞ Արկադի Փելեշյանին, Մամիկոն Ասլանյանը նշեց, որ ինքը ներկայացնում է քաղաքական թիմ և ոչ թե անձ: «Իմ առաջարկել-չառաջարկելը այս պահին որևէ կապ չունի։ Նման պայմանավորվածություն չկա, որևէ բանակցություն իմ կողմից չի վարվում»,- հավելեց նա։
Իսկ թե ինչպես է պատկերացնում խնդրի լուծումը, քաղաքապետը նշեց, որ ամեն ինչ անում է օրենսդրությամբ, և հետայսու էլ որևէ գործողություն իր կողմից բխելու է գործող օրենքի տիրույթից։
