Կոտայքի մարզի Պռոշյան համայնքում օգոստոսի 12-ին հայտնաբերված նորածինը դեռևս ընկեցիկի կարգավիճակ ունի: Երևանի «Մանկան տանը» գտնվող փոքրիկի մայրը մինչ այսօր չի ներկայացել: «Արմենպրես»-ի հետ զրույցում «Մանկան տան» տնօրեն Լիանա Կարապետյանն ասաց, որ դիմել է համապատասխան մարմիններին` հիվանդանոց, որտեղ գտնվել է երեխան, և ոստիկանություն՝ պարզելու արդյոք երեխայով որևէ մեկը հետաքրքրվել է, թե ոչ: «Մինչև չլինեն համապատասխան փաստաթղթեր, մենք հիմքեր չունենք երեխային որդեգրման ենթակա դարձնելու»,-ասաց նա:
Մանկատան տնօրենն ասաց, որ երեխան նորմալ վիճակում է, սակայն դեռ հիվանդանոցում բժիշկները պարզել են, որ ունի սրտի արատ, մակերիկամների կիստաներ: «Երեխայով հետաքրքրվողները շատ են»,-ասաց նա:
ՀՀ աշխատանքի և սոցիալական հարցերի նախարարի մամուլի քարտուղար Անուշ Դանիելյանի խոսքով` երեխայի հայտնաբերվելու օրից երեք ամիսը պետք է լրանա, և եթե այդ ընթացքում նրա մայրը չհայտնվի, երեխան կհամարվի որդեգրման ենթակա: «Նա դեռևս որդեգրման կարգավիճակ չունի»,-ասաց նախարարի մամուլի խոսնակը:
Անուշ Դանիելյանի խոսքով` Հայաստանի ընդհանուր և մասնագիտացված 6 մանկատներում 648 երեխա է խնամվում: 2017 թվականին մանկատներ ուղեգրվել է 95 երեխա, որոնցից 45-ը՝ առողջական խնդիրներ ունեցող:
Փոքրիկ Մարիամիկին օգոստոսի 12-ին մայրը լքել էր Պռոշյան գյուղի դաշտում` ծառի տակ: Նրան տեղափոխել էին «Սուրբ Աստվածամայր» բուժկենտրոն:
