Թերթը գրում է. «Արմատական ընդդիմություն-իշխանություն երկխոսության հարցը վերջին շրջանում դարձել է հեռուստաընկերությունների լրատվական-վերլուծական ծրագրերի թոփ թեման: Քաղբանտարկյալների ազատ արձակմանը զուգահեռ՝ իշխանական քարոզչամեքենան լծվել է կողմերի հնարավոր երկխոսության պրոպագանդային և ՀԱԿ-ի պայքարի նոր մարտավարության դրվատանքին»։
Թե ինչով է պայմանավորված այս հեռուստահեղափոխությունը, թերթը փորձել է պարզել առաջին հերթին Հանրային հեռուստառադիոյի լրատվական վերլուծական հաղորդումների տնօրեն Սամվել Ֆարմանյանից. «Ինչ վերաբերում է ընթացիկ քաղաքական գործընթացների կամ արտախորհրդարանական ընդդիմության գործունեության լուսաբանմանը, դրա քանակական ու որակական կողմերի մասին հնչող կարծիքներին, ապա դա յուրաքանչյուր հեռուստադիտողի իրավունքն է: Մենք ընդամենը բարեխղճորեն անում ենք այն, ինչ մեզ պատվիրված է օրենքով և ինչ թելադրված է լրագրողի մասնագիտական էթիկայի նորմերով: Ու հակառակը՝ չենք անում այն, ինչ պատվիրված չէ օրենքով կամ հակասում է լրագրողի մասնագիտական վարքուկանոնին»,- փիլիսոփայել է ՀՀ նախագահի նախկին խոսնակը: Ուշագրավ է «պատվիրված» և «թելադրված» եզրույթների կիրառումը, զավեշտալի է հղումը լրագրողական էթիկային ու օրենքին»,- գրում է «Հրապարակ»-ը:
«Armenia Today» գործակալության համակարգող Արգիշտի Կիվիրյանի կարծիքով, քանի որ ներկայումս չկան անկախ հեռուստաընկերություններ, եղածներն էլ գործում են իշխանություններից իջեցված հստակ հանձնարարականների շրջանակներում, ՀԱԿ-ի նկատմամբ հեռուստաընկերությունների ներկայիս բացահայտ «սերը» բացատրվում է միմիայն իշխանությունների կողմից իջեցված «նոր ուղու» հանձնարարականով: «Առավել ևս, որ իշխանություններն այս կապակցությամբ տուժելու խնդիր չունեն, քանի որ ցանկացած պահի կարող են «եթերային սերը» ՀԱԿ-ի նկատմամբ շուռ տալ այլ ուղղությամբ: Իսկ ՀԱԿ-ին ընդգրկելով եթերում, պարզ է, որ իշխանությունները մի բան էլ շահում են միջազգային դաշտում՝ իրենց այդ քայլով միջազգային կառույցների աչքերում և դրա հետ կապված հաշվետվություններում փորձելով ձեռք բերել «հանդուրժողի և ժողովրդավարի» կարգավիճակ»: Իսկ ինչպե՞ս են վերաբերվում այս սև քարոզչությանը արմատական ընդդիմության ներկայացուցիչները և այն ի՞նչ ազդեցություն կունենա ընդդիմության համակիրների տրամադրությունների վրա, Լևոն Տեր-Պետրոսյանի մամուլի խոսնակ Արման Մուսինյանը վստահեցրել է. «Արդեն վաղուց իշխանական պրոպագանդան ինչպիսի ձևեր էլ ընդունի, ի վիճակի չէ ազդել հասարակության վրա: Այսօր հասարակական կարծիքի վրա միայն ազդեցություն ունի Հայ ազգային կոնգրեսը: Մեկ պարզ պատճառով, որ միայն Կոնգրեսն ասելիք ունի ու պատրաստ է աշխատել նրա հետ»:
