ԱԺ պետաիրավական հարցերի հանձնաժողովի նախագահ, Հայաստանի Սահմանադրության փոփոխության, այսպես ասած, մասնագիտական կնքահայրերից մեկը հանդիսացող Հրայր Թովմասյանը հայտարարել է, որ նոր Սահմանադրությունը կառավարման նոր մոդելի պայմաններում ենթադրում է առավելագույնը 3 փոխվարչապետ, սակայն ոչ պարտադիր 3-ը: Նրա խոսքով՝ երրորդ փոխվարչապետի հարցը կախված է նրանից, թե ինչով է զբաղվելու կառավարությունը: Ըստ այդմ՝ երրորդ վարչապետի անհրաժեշտություն կարող է առաջանալ, կարող է նաև՝ ոչ: Երրորդ փոխվարչապետի վերաբերյալ արդեն իսկ եղել են տարբեր հրապարակումներ, մասնավորապես այն շեշտադրմամբ, որ այդ պորտֆելը բաժին կհասնի ՀՀԿ կոալիցիոն գործընկեր Դաշնակցությանը:
Ուշագրավն այն է, որ Դաշնակցությունը չի հրաժարվում այդ պորտֆելից, պարզապես հայտարարում է, որ իր համար դա կարևոր չէ և կքննարկի այդ հարցը, երբ կգա ժամանակը: Մյուս կողմից՝ չի բացառվում, որ Սերժ Սարգսյանը Դաշնակցության հետ կոալիցիայի շրջանակում այդ հարցը չի էլ քննարկել, և երրորդ փոխվարչապետի պաշտոնը կամ փոխվարչապետի երրորդ պաշտոնը նրա համար «պահեստային» տարբերակ է, անհրաժեշտության դեպքում իշխանական կարկանդակի ռեզերվային կտոր: Իսկ դա նշանակում է, որ Սարգսյանը նախապես այն չէր խոստանա որևէ մեկին, այդ թվում՝ ՀՅԴ-ին, քանի որ իրավիճակը 2018-ին կարող է հանգել մի դասավորության, երբ 3-րդ փոխվարչապետի պաշտոնը Սերժ Սարգսյանն առաջարկի, օրինակ, «Ծառուկյան» դաշինքին՝ որոշակի քաղաքական աջակցության դիմաց, ընդ որում՝ առանց կոալիցիոն համաձայնագրի:
Ավելին, Հրայր Թովմասյանի պարզաբանում-հայտարարությունը գործնականում նշանակում է, որ Սերժ Սարգսյանը արդեն իսկ երրորդ փոխվարչապետի պաշտոնը հանում է ներիշխանական կամ ներհամակարգային «աճուրդի» և թերևս կսպասի հայտերի, թե ով ավելի բարձր քաղաքական գին կառաջարկի դրա համար: Իհարկե, չի բացառվում, որ Սարգսյանն այդ գնի կարիքը 2018-ի ապրիլին չունենա, այդ դեպքում նա, իհարկե, «ապրանքը» կպահի հետագա անհրաժեշտ ժամանակաշրջանի համար: Ընդ որում, ամենևին պետք չէ բացառել և այն, որ «գնորդը» լինի ՀՀԿ շրջանակից, այսինքն՝ հենց իշխող մեծամասնության ներսից, քանի որ ՀՀԿ-ն էլ ամենևին միատարր օրգանիզմ չէ, և չի բացառվում, որ փոխվարչապետի, այսպես ասած, ավելորդ կամ երրորդ ոչ ավելորդ պաշտոնի միջոցով հարկ լինի պայմանավորվել որևէ թևի հետ՝ մեծ կամ փոքր:
Համենայնդեպս, այժմ պարզ է դառնում, որ առկա է, այսպես ասած, «ազատ կապիտալ», որը Սերժ Սարգսյանը կարող է տեղաբաշխել որևէ «ընկերությունում» և առաջիկա ամիսներին կփորձի դիտարկել, թե որտեղ է ամենից մեծ դիվիդենդի հնարավորությունը:
