Ռուսաստանը ՆԱՏՕ-ից չի ստանա անհրաժեշտ իրավական երաշխիքներ առ այն, որ Եվրոպայում ստեղծվելիք հակահրթիռային պաշտպանության համակարգն ուղղված չի լինելու Ռուսաստանի դեմ: Այս մասին ասել է Հյուսիսատլանտյան դաշինքի գլխավոր քարտուղար Անդերս Ֆոգ Ռասմուսենը Interfax գործակալությանը տված հարցազրույցում:
Բացի այդ, Դաշինքի ղեկավարությունը հարկ չի համարում ստեղծել հակահրթիռային համատեղ համակարգ: Ռասմուսենը պնդել է, որ ՆԱՏՕ-ի ծրագրերը ոչ մի կերպ վտանգ չեն ներկայացնում Ռուսաստանի անվտանգության և ինքնիշխանության համար, իսկ փոխադարձ անվստահությունն անվանեց «Սառը պատերազմի» ժամանակների մնացուկ: Նա կարծիք է հայտնել, որ իրականում Ռուսաստանի շահերից է բխում ՆԱՏՕ-ի ընդլայնումը, քանի որ դա ամրապնդում է Ռուսաստանի անվտանգությունը:
Ռասմուսենն ավելացրել է, որ ինքը կօգնի ամրապնդելու վստահությունը ՌԴ-ի և ՆԱՏՕ-ի միջև, որպեսզի փոխադարձ հարաբերությունները դառնան իրոք գործընկերային: Նա շեշտել է, որ շահերի և ազդեցությունների ոլորտների հայեցակարգը հնացել է, իսկ այդ ամենի տեղը պատմության աղբանոցում է: