Երգիչ-երգահան Ռուբեն Հախվերդյանը տեղյակ չէ, որ սեպտեմբերին ստալինյան ռեպրեսիաների դեմ ցուցահանդես է փակվել:
«Արմեն Ամիրյանը իմ կրտսեր, բայց շատ լավ բարեկամն ու ընկերն է: Ամբողջ հարցը նրանում է՝ նա կարո՞ղ է այս համակարգում աշխատել, նրան պետք է թույլ տան: Նա շատ խելացի մարդ է, լայնախոհ երևույթ է»,- ասաց Ռուբեն Հախվերդյանը:
Հարցին՝ ինչպե՞ս է հնարավոր Հայաստանում հասնել փոփոխությունների, Ռուբեն Հախվերդյանը նշեց, որ ինքը քաղաքական գործիչ չէ և չի կարող անել:
«Մտավորականություն բառը սովետական արտահայտություն է, մտավորականությունը մեր ամբողջ ժողովուրդն է, հարցրեք վարորդին, նույն կերպ կպատասխանի, ինչպես՝ ես»,- ասաց նա՝ հավելելով, որ մտավորականությունը ոչինչ չի կարող անել, քանի որ մենք ղեկավարվում ենք հյուսիսից, ու էլի որպես «խուրդա» օգտագործվելու ենք ռուս-թուրքական հարաբերություններում. «Չէ՞ որ Պուտին կոչեցյալը, երբ գնաց Էրդողանի հետ խոսեց, ինչ-որ բաներ, բնականաբար, Ղարաբաղի մասին խոսացած կլինեն»,- ասաց Ռուբեն Հախվերդյանը:
Նրա խոսքերով՝ մտավորականներից շատերին առել են փողով և տարբեր ձևերով. «Հիմա ես չեմ ուզում անհամեստ երևալ, ինձ փորձել են, բայց ես այնքան խորամանկ եմ, որ գիտեք՝ աղվեսը դուրս գալու քանի ճանապարհ ունի, երբ բունն է մտնում, մի ութ տեղից ծակ ունի դուրս գալու: Ուղղակի մերժել եմ այն, ինչ ինձ առաջարկել են»:
Նա նաև նշեց, որ անարդար և կաշառակեր, քավոր-սանիկական պետություն է Հայաստանը. «Սա նույնիսկ պետություն էլ չէ, սա տարածք է, որտեղ մի քանի ընտանիքներ իշխում են ժողովրդին»:
Ամբողջությամբ՝ տեսանյութում:
