Մեկ շաբաթ առաջվա իրավիճակի հետ համեմատ՝ հիմա որոշակի լարվածություն կա: Արցախում այսօր՝ հոկտեմբերի 24-ին լրագրողների հետ հանդիպման ժամանակ այս մասին հայտարարեց Պաշտպանության բանակի հրամանատար Լևոն Մնացականյանը՝ անդրադառնալով ադրբեջանական զինված ուժերի կողմից հոկտեմբերի 22-ին և 23-ին «ՍՊԱՅԿ» տիպի հեռակառավարվող հակատանկային հրթիռի կիրառմանը:
Նա նշեց, որ լարվածությունը պայմանավորված է Ադրբեջանի զինված ուժերի կողմից հրադադարի ռեժիմի խախտմամբ, և հիշեցրեց, որ հոկտեմբերի 19-ին էլ ադրբեջանական դիպուկահարի կողմից հայ զինծառայող է խոցվել:
ՊԲ հրամանատարը հնարավոր է համարում, որ աստիճանաբար լարվածության աճ լինի: «Մենք արդեն տեղեկացրել ենք, որ եթե հետագայում նման հարվածներ լինեն, պատասխան լինելու է: Դեռեւս կարծում ենք, որ «ՍՊԱՅԿ»-ին պատասխանելու անհրաժեշտություն չկա: Առաջիկա օրերին մենք հանդիպելու ենք ԵԱՀԿ Մինսկի խմբի ներկայացուցիչների հետ և քննարկելու ենք ստեղծված իրավիճակը»,- հավելեց Մնացականյանը:
