«Մենք միշտ ասել ենք, որ Կովկասյան տարածաշրջանում խաղաղությունն ու կայունությունը միայն սահմանների բացմամբ չի լինի, Թուրքիան այդ հարցում շատ անկեղծ է. մենք խաղաղություն եւ կարգուկանոն ենք ցանկանում տարածաշրջանում, սակայն Հայաստանի հետ սահմանի բացումը բազմակողմանի խաղաղության չի հանգեցնի»,-ադրբեջանական APA գործակալությանը տված հարցազրույցում հայտարարել է Ադրբեջանում Թուրքիայի դեսպան Հուլուսի Քլըջը՝ մեկնաբանելով հայ-թուրքական հարաբերությունների կարգավորման ներկա ընթացքը: «Հայաստանը հայտարարել է, թե սառեցնում է արձանագրությունները: Բայց Թուրքիան հավատարիմ է արձանագրությունների տառին եւ ոգուն: Մենք ցանկանում ենք, որ Հայաստանը կարգավորի իր հարաբերություններն Ադրբեջանի եւ Թուրքիայի հետ: Թուրք եւ ադրբեջանցի ժողովուրդները եղբայրներ են: Այդ մասին պետք է իմանան բոլորը, այդ թվում՝ արեւմտյան երկրները»,- ասել է դիվանագետը:
Դեսպանը նշել է նաեւ. «Եվրոպական երկրները եւս աջակցում են Հարավային Կովկասի խաղաղությանը: Սակայն փաստը, որ մի երկրի տարածքների 20 տոկոսը օկուպացված է, մոտ 1 միլիոն մարդ փախստական է, արդար չէ: Թուրքիայի եւ Հայաստանի հարաբերությունների կարգավորման հետ մեկտեղ պետք է կարգավորվեն Ադրբեջանի եւ Հայաստանի հարաբերությունները»:
