Ինձ առաջադրված մեղադրանքում հանցակազմ չկա, ես եկել եմ այստեղ, որ ինքս մեղադրեմ: Այս մասին այսօր դատական նիստի մեկնարկին հայտարարեց Զանգվածային անկարգություններ կազմակերպելու մեջ մեղադրվող Անդրիաս Ղուկասյանը՝ հավելելով, որ ստեղծված իրավիճակի համար ով է պատասխանատու` միայն Հյաստանի իշխանություններն են:
Նշենք, որ գործով երկրորդ դատական նիստը տեղի է ունենում առանց գործով 36 տուժողների:
Անդրիաս Ղուկասյանը բացարկի միջնորդություն ներկայացրեց գործով դատախազ Պետրոս Պետրոսյանին՝ հիշեցնելով, որ դատախազը երեք տասնյակ միջնորդությունները մերժել է ընդամենը մեկ օրում, որը միայն խոսում է քաղաքական պատվեր կատարելու մասին:
Դատախազ Պետրոս Պետրոսյանը առարակեց միջնորդության դեմ` նշելով, որ միջնորդության հիմքը փաստարկված չէ:
Ըստ մեղադրանքի՝ Անդրիաս Ղուկասյանը 2016թ. հուլիսի 29-ին Երեւան քաղաքում կազմակերպել է զանգվածային անկարգություններ, ինչպես նաեւ փորձել է միանալ 2016թ. հուլիսի 17-ին Երեւան քաղաքի Մ.Խորենացի փողոցի 158 հասցեում տեղակայված՝ ՀՀ ոստիկանության Երեւան քաղաքի վարչության պարեկապահակային ծառայության գնդի տարածքում գտնվող շենքերը, շինությունները եւ տրանսպորտային միջոցները զավթած , ոստիկաններ եւ բուժաշխատակիցներ պատանդ վերցրած կազմակերպված, զինված խմբին, զինվել, ապօրինի կերպով հրազեն ու ռազմամթերք կրել, պահել եւ խմբի անդամների հետ համակատարմամբ շարունակել պահել զավթածն ու պատանդներին, սակայն հանցագործություններն ավարտին չի հասցրել իր կամքից անկախ հանգամանքներով:
Ղուկասյանը կալանքի տակ է:
