Գիտելիքի օրվա կապակցությամբ Հայաստանի Ազգային ժողովի նախագահ Արա Բաբլոյանը«Արգենտինայի Հանրապետություն» № 76 հիմնական դպրոցում մասնակցեց ուսումնական տարվա մեկնարկին նվիրված տոնական միջոցառմանը:
Միջոցառմանը մասնակցում էր նաև Հայաստանում Արգենտինայի արտակարգ և լիազոր դեսպան Գոնզալո Ուրրիոլաբեիտիան:
ՀՀ ԱԺ նախագահը ընդգծեց, թե շատ ուրախ է, որ հերթական անգամ առիթ է ընձեռվել մասնակցելու ուսումնական տարվա մեկնարկին նվիրված միջոցառմանը այն դպրոցում, որտեղ սովորել է ինքը: «Շատ հպարտ եմ, որ ավարտել եմ հենց այս դպրոցը և հիմա ևս մեկ անգամ առիթ ունեմ այստեղ մասնակցելու ուսումնական տարվա մեկնարկին նվիրված միջոցառմանը: Դպրոցը ոչ միայն գիտելիքներ ձեռք բերելու, այլ նաև մարդկանց հետ շփվելու, ընկերներ ձեռք բերելու միջավայր է: Ընկերության և բարեկամության շատ վառ օրինակ է հայ-արգենտինական բարեկամությունը, իսկ այդ բարեկամության վկայությունն է Երևանում հայ-արգենտինական դպրոցի առկայությունը»,- ընդգծեց Արա Բաբլոյանը:
Նա հավելեց, որ հայ-արգենտինական համագործակցությունը բարձր մակարդակի վրա է, սակայն այն ավելի ընդլայնելու, ամրապնդելու անհրաժեշտություն կա: «Մենք դեսպանի հետ խոսում էինք և արդյունքում եկել ենք եզրակացության, որ երկու երկրների միջև համագործակցությունը պետք է ավելի ընդլայնենք: Պետք է մտածենք, թե ինչ նոր ծրագրեր կարող ենք իրականացնել, որպեսզի նոր թափ հաղորդենք հայ-արգենտինական հարաբերություններին»,- ասաց ՀՀ ԱԺ նախագահը:
Հայաստանում Արգենտինայի արտակարգ և լիազոր դեսպան Գոնզալո Ուրրիոլաբեիտիան հիշեցրեց, որ սեպտեմբերի 1-ին Հայաստանում նշում են գիտելիքի օրը` հավելելով, որ կցանկանար փոքրիկ ուղղում մտցնել: «Ես առաջարկում եմ, որպեսզի այն անվանենք գիտելիքի և ընկերության օր, որովհետև այստեղ հավաքված են մարդիկ, ովքեր յուրահատուկ սեր են տածում ինչպես գիտելիքի, այնպես էլ ընկերության նկատմամբ: Իսկ այս դպրոցը հայ և արգենտինացի ժողովուրդների բարեկամության վկայությունն է»,- նշեց դեսպանը` հույս հայտնելով, որ առաջիկայում այբ բարեկամությունն էլ ավելի կխորանա, իսկ ինքը դեռ շատ առիթներ կունենա հայ-արգենտինական դպրոցում տարբեր միջոցառումների մասնակցել:
ՀՀ ԱԺ նախագահը և ՀՀ-ում Արգենտինայի դեսպանը մասնակցեցին նաև դպրոցին գրքերի նվիրատվության հանդեսին: Միջոցառման ավարտին` ի նշան հայ-արգենտինական բարեկամության, աղավնիներ օդ բաց թողնվեցին:
