Դիլիջանում օգոստոսի 30-ին տեղի ունեցավ «Մոնթե Մելքոնյան ռազմամարզական վարժարան» հիմնադրամի հոգաբարձուների խորհրդի անդրանիկ նիստը: հոգաբարձուների խորհրդի անդամներն են՝ ՀՀ պաշտպանության նախարար Վիգեն Սարգսյանը, ՀՀ արդարադատության նախարար Դավիթ Հարությունյանը, Տավուշի թեմի առաջնորդ Բագրատ սրբազան Գալստյանը, Տեր Մեսրոպ քահանա Արամյանը, ՀՀ Ազգային ժողովի պատգամավոր Շուշան Պետրոսյանը և այլք:
Հոգաբարձուների խորհուրդը խորհրդի նախագահ ընտրեց Պաշտպանության նախարար Վիգեն Սարգսյանին:
Վերջինս շնորհակալություն հայտնեց խորհրդի անդամներին վստահության համար և ասաց, որ հոգաբարձուների խորհուրդը ձևավորվել է գիտակ ու կարող մարդկանցից, ովքեր կարողանալու են իրենց ներդրումը բերել այս վարժարանի կայացմանը:
Պաշտպանության նախարարը լրագրողների հետ զրույցում նշեց, որ այս տարի վարժարան դիմողների թիվը եղել է բավականին բարձր:
«Այս տարի վարժարանն ունենալու է 210 աշակերտ, ովքեր գալու են տարբեր մարզերից: Սեպտեմբերի 1-ին այս հիասքանչ նոր համալիրը կդառնա Հայաստանի ռազմամարզական կարևորագույն հաստատությունն ավագ դպրոցի աշակերտների համար: Աշակերտները երեք տարիների ընթացքում կստանան ռազմական խորացված կրթություն և հուսով եմ, որ շրջանավարտների մեծ մասը կընտրի սպայականը՝ որպես հիմնական մասնագիտություն իրենց կյանքում»,- ասաց Սարգսյանը:
Նախարարը կարևորեց նաև վարժարանի մանկավարժական կազմը և նշեց, որ վարժարանում ստեղծվել են բոլոր պայմանները՝ կրթությունը բարձր մակարդակով ապահովելու համար:
«Ընտրվել է արհեստավարժ մանկավարժական կազմ, ստեղծվել են բոլոր պայմանները՝ կրթությունը բարձր մակարդակով ապահովելու համար: Մենք կարողանալու ենք այս վարժարանի միջոցով ավելացնել զինվորական մասնագիտության գրավչությունը»,- ընդգծեց Վիգեն Սարգսյանը:
