Բյուջեի ճգնաժամը ԱՄՆ-ի տնտեսության համար կարող է աղետալի հետևանքներ ունենալ: Նման ցնցումից երկիրը կարող է չսթափվել մի քանի տասնամյակ՝ նշվում է ԱՄՆ-ի ֆինանսների նախարարության զեկույցում:
Պաշտոնապես համարվում է, որ ԱՄՆ ֆինանսների նախարարությունը կսպառի փոխառությունների սահմանը, ինչպես նաև ազատ գումարային միջոցները 2013-ի հոկտեմբերի 22-ից մինչև ամսվա վերջ ընկած ժամանակահատվածում:
Եթե այդ ժամանակ պետական պարտքի առաստաղը բարձրացված չլինի, աշխարհում խոշորագույն տնտեսությունը դեֆոլտ կհայտարարի՝ հստակեցնում է Russian Today-ը:
«Դեֆոլտի դեպքում ճգնաժամ է սպառնում ոչ միայն ֆինանսական շուկաներին, այլև աշխատանքի և սպառողական շուկային: Վերլուծաբանների կարծիքով` ԱՄՆ տնտեսությունը կարող է հասնել 2008-ի ճգնաժամային իրավիճակին, հնարավոր է նաև ավելի վատ: Բանը կարող է հասնել «Մեծ դեպրեսիայի» տարիների ճգնաժամի մասշտաբներին»,- նշվում է հաշվետվության մեջ:
Բացի այդ, ԱՄՆ ֆինանսական ցնցումները կառնչվեն ամբողջ աշխարհին: Մասնավորապես, կսառեցվեն վարկային շուկաները, կարժեզրկվի դոլարը, և կտրուկ կաճեն տոկոսադրույքները:
Անհանգստացած է նաև Արժույթի միջազգային հիմնադրամը:
