Այսօր թիվ 38 ընտրատարածքում անց են կացվում ԱԺ մեծամասնական ընտրակարգով լրացուցիչ ընտրություններ: Առավոտյան ժամը 8.00-ին սահմանված կարգով բացվել են ընտրությունների համար ձևավորված բոլոր ընտրական տեղամասերը:
Հիշեցնենք, որ ԱԺ պատգամավորի թափուր մանդատին հավակնում են ՀՀԿ-ի կողմից առաջադրված ՀՀԿ անդամ, Սյունիքի մարզպետի խորհրդական Արմեն Կարապետյանը և «Ժառանգություն» կուսակցության կողմից՝ նույն կուսակցության Կապանի տարածքային ստորաբաժանման համակարգող Սամվել Հայրապետյանը:
ԱԺ մեծամասնական ընտրակարգով լրացուցիչ ընտրությունների համար կազմավորված 76 տեղամասային ընտրական հանձնաժողովների կազմերում ընդգրկված 608 քաղաքացիներից առավոտյան մինչև ժամը 8.00-ն տեղամասային ընտրական հանձնաժողով չեն ներկայացել 13-ը:
Հանձաժողովների բացակայող անդամներից 5-ը ներկայացնում են Հայ ազգային կոնգրես կուսակցությունների դաշինքը, 7-ը` «Օրինաց երկիր» կուսակցությունը և հանձաժողովի մեկ անդամ` «Բարգավաճ Հայաստան» կուսակցությունը:
Կազմավորված 76 տեղամասային ընտրական հանձնաժողովների բոլոր նախագահներն ու քարտուղարներն սահմանված կարգով ներկայացել են ընտրական հանձնաժողովներ:
