Մարտի 1-ի զոհերից Գոռ Քլոյանի մայրը՝ Ազատուհի Քլոյանը, չի կարծում, որ զինդատախազ Գևորգ Կոստանյանին ՀՀ գլխավոր դատախազ նշանակելով՝ Մարտի 1-ի դեպքերը կբացահայտվեն: Այս մասին նա ասաց «Առաջին լրատվական»-ի հետ զրույցում:
«Եվ Աղվան Հովսեփյանը, և Գևորգ Կոստանյանը նույն սանրի կտավն են: Ի՞նչ տարբերություն՝ քաչալ Հասա՞ն, թե՞ Հասան քաչալ: Կարծում եմ՝ ամեն ինչ ավելի վատ է լինելու»,- պարզաբանեց նա՝ միաժամանակ հավելելով, որ Կոստանյանի՝ նոր պաշտոնում հաստատվելուց հետո 2008 թվականի մարտիմեկյան իրադարձությունները, միևնույն է՝ կմնան չբացահայտված:
Հարցին՝ ինչպե՞ս է վերաբերվում ՀԱԿ խմբակցության ղեկավար Լևոն Զուրաբյանի՝ Կոստանյանի թեկնածության շուրջ ավելի շատ դրական, քան բացասական արտահայտվելու փաստին, Ազատուհի Քլոյանը պատասխանեց՝ ճիշտ է, վերջին վեց տարիների ընթացքում այդ քաղաքական ուժն իրենց կողքին է եղել, մխիթարել է իրենց, սակայն այժմ անհասկանալի է՝ ինչպես է Կոստանյանի թեկնածության հետ հույսեր կապում:
«Գուցե Հայ ազգային կոնգրեսը Գևորգ Կոստանյանի հետ հույսեր է կապում, բայց անկեղծ ասած՝ չգիտեմ՝ ինչ հիմքերով»,- ամփոփեց նա:
Հիշեցնենք, որ ՀՀ գլխավոր դատախազի պաշտոնում Սերժ Սարգսյանն առաջադրել է զինդատախազ Գևորգ Կոստանյանի թեկնածությունը: ԱԺ-ն առաջիկա քառօրյայում կքննարկի և փակ գաղտնի քվեարկությամբ որոշում կկայացնի այդ հարցով:
Հիշեցնենք նաև, որ գլխավոր դատախազը ընտրվում է վեց տարի ժամկետով՝ նախագահի ներկայացմամբ և խորհրդարանի կողմից:
