«Սասնա ծռերի» խոսնակ Վարուժան Ավետիսյանը բաց նամակով դիմել է «Կարին» ազգագրական երգի-պարի խմբի հիմնադիր և գեղարվեստական ղեկավար Գագիկ Գինոսյանին, որում նշված է. «Գինոսյա՛ն, կողմնորոշվի՛ր. Լսել եմ, որ օրեր առաջ Գագիկ Գինոսյանը մի միջոցառման ժամանակ կանգնած է եղել Սերժ Սարգսյանի կողքին և դեռ Նժդեհից էլ մեջբերում է կատարել իրեն բնորոշ պաթետիկ ոճով։ Եթե լսածս համապատասխանում է իրականությանը, ապա Գինոսյանը թող այսուհետև ոչ թե Նժդեհից, այլ Համառուսաստանյան արտակարգ հանձնաժողովի (ВЧК)՝ Ադրբեջանի և Հայաստանի ստորաբաժանման նախագահ Գևորգ Աթարբեկովից մեջբերումներ կատարի»։
«Կարին» ազգագրական երգի-պարի համույթի գեղարվեստական ղեկավար Գագիկ Գինոսյանը չի հավատում, որ բաց նամակը գրել է Վարուժան Ավետիսյանը: Նա կապ է հաստատել «Սասնա ծռեր» խմբի անդամ Ալեք Ենիգոմշյանի հետ, ով նույնպես ասել է, որ տեղյակ չէ նման բովանդակությամբ բաց նամակից:
«Ինչ վերաբերում է մեղադրանքին, ապա պետք է վստահ ասեմ, որ ես ոչ մի անգամ ոչ մեկի կողքը կանգնած չեմ եղել, միշտ կանգնած եմ եղել իմ գաղափարական ուղու վրա և երբեք չեմ շեղվել: Ինչ վերաբերում է այդ հանդիպմանը, ապա այն եղել է Դիլիջանում, որտեղ ներկա են եղել մտավորականներ, խորհրդակցությունը եղել է նստած, ես շատ հեռու եմ նստած եղել: Քննարկվել է բանակի թեման, իսկ ես արդեն որերորդ տարին է՝ պաշտպանության նախարարին առընթեր հասարակական խորհրդի անդամ եմ, դեռ Վիգեն Սարգսյանից էլ առաջ՝ Սեյրան Օհանյանի ժամանակ»,- ասաց Գագիկ Գինոսյանը:
Նա նշեց, որ ինքը պատասխանատու է իր յուրաքանչյուր քայլի համար, երբեք որևէ պաշտոնի չի եղել, որևէ մեկից որևէ նվեր չի ստացել, բացի պատժելուց՝ իշխանությունը որևէ այլ կերպ իրեն չի վերաբերվել:
Հարցազրույցն ամբողջությամբ՝ տեսանյութում: