Վենեսուելական Telesur հեռուստաալիքին տված հարցազրույցում Սիրիայի նախագահ Բաշար Ասադը հայտարարել է, որ չի բացառում իր երկրի դեմ ԱՄՆ-ի ռազմական ակցիայի հնարավորությունը նույնիսկ քիմիական զենքի ոչնչացմանը վերաբերող պարտավորությունների կատարումից հետո:
Ասադը նաև նշել է, որ քիմիական զենքն ընդդիմադիրներն են կիրառել, և դա են ապացուցում ընդդիմության գրոհայինների խոստովանություններն ու առկա այլ վկայություններ:
Սիրիայի նախագահը հայտնել է, որ Սիրիայի իշխանություններն ընդդիմության գրոհայինների մոտ հայտնաբերել են մարտական քիմիական նյութերով «պարկուճներ» և լաբորատորիաներ, որտեղ մշակվել են այդ թունավոր նյութերը: Այս մասին փոխանցում է Interfax-ը: Նրա խոսքով՝ այդ բոլոր ապացույցները փոխանցվել են ռուսական կողմին:
Ասադն ընդգծել է, որ վստահ է՝ ընդդիմության գրոհայինները փորձում են խոչընդոտել ՄԱԿ-ի տեսուչների աշխատանքին, ովքեր արդեն Դամասկոսում են՝ շարունակելու քիմիական զենքի կիրառման փաստերի հետաքննությունը: Նա վստահեցրել է, որ սիրիական բանակի քիմիական զենքի բոլոր զինանոցները գտնվում են խիստ վերահսկողության ներքո:
