Անցած տարվա ընթացքում բերքատվության նվազումը կապված է եղել բնական աղետների՝ կարկտահարության և ցրտահարության հետ: Ազգային ժողովի տարածքային կառավարման և տեղական ինքնակառավարման, գյուղատնտեսական և բնապահպանական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում ՀՀ 2016թ. պետական բյուջեի կատարման հաշվետվության քննարկման ժամանակ այս մասին ասաց ՀՀ գյուղատնտեսության նախարար Իգնատի Առաքելյանը՝ պատասխանելով ՀՀԿ խմբակցության պատգամավոր Արայիկ Հովհաննիսյանի հարցին: «Այստեղ անհրաժեշտ է համակարգային լուծում, որը գյուղատնտեսության ոլորտի ապահովագրումն է: Պայմանագիրն արդեն ստորագրել ենք, 2018թ. սկսելու ենք ոլորտում ապահովագրական համակարգ ներդնելու աշխատանքները»,- ասաց նախարարը:
Իգնատի Առաքելյանն անդրադարձավ նաև հակակարկտային կայանների աշխատանքի արդյունավետությանը: Նա հայտնեց, որ նախատեսվում է Վայոց Ձորում պիլոտային նոր կայան ունենալ: «Կտեսնենք, թե այն ինչպես է աշխատում և արդյունավետ լինելու դեպքում կտարածենք ողջ երկրում»,- ընդգծեց Առաքելյանը:
Նախարարը նաև հայտնեց, որ նախատեսվում է հանրապետությունում 1400 հեկտարի տարածք ծածկել հակակարկտային ցանցերով:
Լուսանկարը՝ aravot.am-ի
