Երեք շաբաթ առաջ՝ սեպտեմբերի 5-ին, «Առաջին լրատվականը» հարցում էր ուղարկել ՀՀ նախագահի աշխատակազմ, արտգործնախարարություն և էկոնոմիկայի նախարարություն՝ մեր տնտեսության վրա Մաքսային միություն մտնելու հետևանքների մասին:
Սեպտեմբերի 4-ին Հայաստանի նախագահի աշխատակազմի ղեկավար Վիգեն Սարգսյանը «Ազատություն» ռադիոկայանին տված հարցազրույցում հայտարարել էր, թե եղել են փորձագիտական խմբեր, որոնք եկել են այն եզրակացության, որ ընդհանուր սահմանի բացակայությունը հաղթահարելի է, և որ Մաքսային միությունը «արդյունավետ և օգտակար» է Հայաստանի տնտեսության համար:
Մենք փորձել էինք պարզել՝
1. Ի՞նչ փորձագիտական խմբերի մասին է խոսքը, ե՞րբ են դրանք ձևավորվել և աշխատել, ովքե՞ր են ընդգրկված եղել այդ փորձագիտական խմբերում:
2. Ընդհանուր սահմանի բացակայության կոնկրետ ի՞նչ խնդիրների մասին է խոսք եղել, և կոնկրետ ի՞նչ լուծումներ են դրանց տրվել, որոնք «թույլ են տալիս հաղթահարել այդ բարդությունը»
3. Հաշվի առնելով մեր տնտեսության այսօրվա կառուցվածքը և առաջիկա տարիների զարգացման հեռանկարները՝ Մաքսային միությանն անդամակցումը ի՞նչ օգուտներ կարող է տալ Հայաստանին:
4. Որքանո՞վ է համատեղելի Մաքսային միության մաքսային քաղաքականությունը Առևտրի համաշխարհային կազմակերպության այն սկզբունքների ու դրույթների հետ, որոնք այսօր գործում են Հայաստանի պարագայում:
5. Ի՞նչ բացասական հետևանքներ կարող է թողնել Մաքսային միությանն անդամակցումը Հայաստանի տնտեսության վրա:
Անցել է արդեն երեք շաբաթ, սակայն վերը նշված գերատեսչություններից ոչ մեկը այդպես էլ չի պատասխանել: Մեզ մնում է միայն հուսալ, որ մի քանի ամիս հետո այդ գերատեսչություններում կկարողանան քիչ թե շատ տրամաբանված գրավոր տեքստ կազմել Մաքսային միության հետևանքների վերաբերյալ:
