Այսօր Բրյուսելում անցկացվում է «Առանց ավտոմեքենայի օր» ակցիան: Ավտոտրանսպորտի երթևեկությունն արգելված է ժամը 9.00-ից մինչև 19.00-ը: Ավտոմեքենայի ղեկին կարող են նստել միայն հաշմանդամները, առևտրականները և բժիշկները: Մնացած բոլորի համար երթևեկությունը հնարավոր է միայն հատուկ անցագրով` 30 կմ/ժ առավելագույն արագությամբ: Կարելի է օգտվել հասարակական տրանսպորտի ծառայություններից, որով երթևեկելն անվճար է բոլորի համար` առանց բացառությունների, հաղորդում է «Գոլոս Ռոսիի» ռադիոկայանը:
Ակցիայի նպատակն է մաքրել Բելգիայի մայրաքաղաք Բրյուսելի օդն ավտոմեքենաների արտանետած գազից: Այս կապակցությամբ Բրյուսելի կենտրոնում` արդարադատության պալատի մոտ, բնապահպանները հրապարակը զարդարել են խոտով, իսկ գյուղատնտեսության ներկայացուցիչները հյուրերին հյուրասիրում են էկոլոգիապես մաքուր ուտեստներ:
«Առանց ավտոմեքենայի օրվա» կապակցությամբ Բրյուսելի շատ շրջաններում կազմակերպվել են սպորտային և մշակութային տարբեր միջոցառումներ:
Նշենք, որ Եվրոպայում ԵՄ երկրների շարքում «Առանց ավտոմեքենայի օր» առաջին անգամ անցկացրել են Մեծ Բրիտանիայում, Իսլանդիայում և Ֆրանսիայում: 2000 թ. սկսած՝ այն անցկացվում է ԵՄ այլ երկրներում:
