Մայիսի 30-ին, ժամը 11.50-ին, ոստիկանության Էրեբունու բաժին է զանգահարել մի քաղաքացի և հայտնել, որ Դավիթ-Բեկի փողոցի թիվ 52 հասցեում գտնվող «Պարտեզ» ռեստորանի վերջնամասում` Էլեկտրասյան տակ, զենք-զինամթերք է թողնում:
Մեկնած օպերատիվ խումբը նշված վայրում, պոլիէթիլենային տոպրակի մեջ, հայտնաբերել է ինքնաշեն «Նագան» ատրճանակ, «Ֆ-1» 2 նռնակ` առանց պայթուցիչների, նռնակի պայթուցիչ, «Չերյոմուխա» ծխային նռնակ, «ՌԳՄ-2» տիպի արկի մարտական գլխիկ, «Տրիպլեքս» տիպի տանկի դիտասարք, «Կալաշնիկով» գնդացրի 7.62 մմ տրամաչափի 30, ինքնաձիգի 7.62 մմ տրամաչափի` 29, խոշոր տրամաչափի` 1 և ինքնաձիգի 5.45 մմ տրամաչափի 150 փամփուշտ, գնդացրի ժապավեն և ինքնաձիգի 2 պահունակ:
Հայտնաբերվածն ուղարկվել է փորձաքննության:
Կատարվում է հետաքննություն:
* * *
Մայիսի 30-ին, ժամը 21.30-ին, մի քաղաքացին զանգահարել է ոստիկանության Երևան քաղաքի վարչության հերթապահ մաս և հայտնել, որ «Փարոս» ռեստորանի ճանապարհին զենք-զինամթերք է թողնում:
Ոստիկանության Մալաթիայի բաժնի ծառայողները նշված վայրում հայտնաբերել են որսորդական ողորկափող հրացան, «Ֆ-1» տիպի 2 նռնակ` պայթուցիչներով, «ՌԳԴ» տիպի նռնակ` պայթուցիչով, լուսարձակային հրթիռ, 7.62 մմ տրամաչափի և 5.45 մմ տրամաչափի 51-ական փամփուշտ:
Հայտնաբերվածն ուղարկվել է փորձաքննության:
Կատարվում է հետաքննություն:
