Այսօր Սպայի տանը կայացած միջոցառումից հետո «Արամո» ջոկատի հրամանատար Արամ Թորգոմյանն (Արամո) «Առաջին լրատվական»-ի հետ զրույցում խոսեց վերջին շրջանում ազատամարտիկների բարձրաձայնած հարցերի մասին և հույս հայտնեց, որ պետական այրերը կհասկանան՝ ինչ է կատարվել, ինչ է կատարվում և կօգնեն ազատամարտիկների ընտանիքներին:
Նա նշեց, որ շատ անարժաններ են պարգևների արժանանում, իսկ իսկական կռվածներին անտեսում են. «Շուրջ 120 մարտական գործողություն ունեմ Հայաստանի սահմանամերձ տարածքներում և Արցախում, սակայն դրանց մասին ոչ մի տեղ չկա գրած, պարզվեց՝ ես ընդհանրապես գոյություն չունեմ: Իմ նմանների մասին պատմության մեջ է գրված, սակայն եթե մենք այսօր չխոսենք այդ մասին, հետագայում կունենանք խեղաթյուրված պատմություն: Ում ինչ ձեռք է տալիս, դա էլ գրում են։ Ընդհանուր առմամբ՝ 106 կամավորական ջոկատներ՝ 17 հազար, ամենաշատը՝ 20 հազար մարդ է կռվել, իսկ հիմա 50-60 հազարից են խոսում»:
Արամ Թորգոմյանը պատմեց, որ պատերազմում իր մասնակցությունն ապացուցելու համար ստիպված է եղել բազմաթիվ գեներալների ստորագրություններ հավաքել, սակայն դեռևս չկա նախարարի հրամանը, որ ինքը մասնակցել է արցախյան ազատամարտին. «Երբ իմ 55 ամյակն էր, ոչ ոք չհիշեց, բայց որ զոհված լինեի, կունենայի կիսանդրի, իմ անունով դպրոց, հրապարակ, փողոց։ Բայց քանի որ ես ապրում եմ, ընդհանրապես ոչ ոք չի հիշում, ու դրա համար, թող Աստված ինձ ների, տասն օրից Հայաստանը լքում եմ»:
Հարցին, թե վերջին շրջանում Վազգեն Սարգսյանի հասցեին հնչեցված արտահայտությունները որքանո՞վ են համապատասխանում իրականությանը և հարի՞ր են դրանք մեր գեներալներին, մեր զրուցակիցը պատասխանեց, որ երբ Վազգեն Սարգսյանին սպանեցին, բոլորը սկսեցին գոռալ, որ աշխարհի առաջ խայտառակ եղանք, բայց ամիսուկես հետո բոլոր գեներալները «գլխարկները շուռ տվեցին»: Նրա հավաստմամբ՝ ցուցադրական է այն, ինչ անում են Վազգեն Սարգսյանի համար, քանի որ նրա մահից հետո շատ գեներալներ աթոռակռիվ տվեցին, հետագայում բարձրացան, բայց իրենց հոգու մեջ Վազգեն Սարգսյանից վանված ազատամարտիկ տեսանք:
Մանրամասները դիտեք տեսանյութում:
