Հայաստանի դեմոկրատական կուսակցության նախագահ Արամ Գասպարի Սարգսյանն այն կարծիքին է, որ այս կառավարությունը չի հաջողելու, խոստացված ներդրումները կյանքի չեն կոչվելու: «Առաջին լրատվական»-ի հետ զրույցում Արամ Սարգսյանը նշեց, որ ցանկացած լավ նախաձեռնություն պատնեշի է հանդիպելու, քանի որ գործող համակարգը օլիգարխիկ է, կոռուպցիոն է և շատ վնասակար Հայաստանի համար:
«Այս համակարգում ընդամենը կարելի է փոփոխություններ մտցնել՝ կոսմետիկ բնույթի, որովհետև էությունը հետևյալն է՝ գերհարուստների և սովորական մարդկանց միջև տարբերությունն ահռելի է, և այդ պայմաններում, եթե դուք նրանց շահերին չեք կպչում, դուք ոչ մի խնդիր չեք լուծում, եթե դուք ստվերը չեք կրճատում, ուրեմն դուք խնդիրը չեք կարողանում լուծել»,- ասաց նա՝ հավելելով, որ իրենք չեն պահանջում կառավարության հրաժարականը:
