Քաղաքագետ Իգոր Մուրադյանի կարծիքով՝ Իրանի նախագահ Մահմուդ Ահմադինեժադի այցը Հայաստան ամբողջապես կապված է արտաքին խնդիրների հետ և որևէ առնչություն չունի Հայաստանի և Իրանի ներքին խնդիրների հետ:
«Առաջին լրատվականի» հետ զրույցում Մուրադյանը կարծիք հայտնեց, որ այս այցն ունի երկու նպատակ:
Առաջինը, ըստ քաղաքագետի, կապված է տարածաշրջանում ուժերի հավասարակշռության պահպանման հետ: Մուրադյանը նկատեց, որ վերջին շրջանում Թուրքիան մեծ ակտիվություն է դրսևորում և ձգտում է հասնել քաղաքական, տնտեսական էքսպանսիայի, նոր դիրք գրավել Կովկասում և Մերձավոր Արևելքում, այդ թվում՝ Իրաքում:
«Տեղի է ունենում Ռուսաստանի և Թուրքիայի հարաբերությունների սերտացում, ինչը դեռևս ալյանս չի կարելի անվանել, սակայն ալյանսի ձևավորման համար արդեն իսկ շատ գործոններ կան: Իրանը չի կարող մի կողմ մնալ, և որպեսզի տարածաշրջանում ուժերի հավասարակշռությունը չխախտվի, Իրանը հետաքրքրված է լավ հարաբերություններ պահպանել իրեն շրջապատող երկրների և առաջին հերթին Հայաստանի հետ»:
Մուրադյանի գնահատմամբ՝ Ահմադինեժադի Հայաստան այցի երկրոդ պատճառն առնչվում է Իրանի տնտեսական և տեխնիկական շրջափակման հետ: Ըստ քաղաքագետի՝ Իրանին տնտեսական և տեխնիկական շրջափակման ենթարկած կոալիցիոն ուժերը համերաշխություն են պահպանում. «Այդ տեսակետից, Իրանը փորձում է ամեն ինչ անել թույլ չտալու իր վերջնական շրջափակումը և նորմալ հարաբերություններ պահպանել հարևանների, մասնավորապես Հայաստանի, Թուրքմենստանի, Աֆղանստանի, Սիրիայի, Իրաքի հետ»:
