Սիրիայի կառավարության տրամադրության տակ գտնվող քիմիական զենքի զինանոցում կարող է լինել մինչև հազար տոննա թունավոր նյութ: Ինչպես հաղորդում է RIA Novosti-ն, այս մասին լրագրողներին հայտարարել է ԱՄՆ Պետդեպարտամենտի բարձրաստիճան պաշտոնյան:
Հիշեցնենք, որ Ժնևում ԱՄՆ պետքարտուղար Ջեն Քերին և Ռուսաստանի արտգործնախարար Սերգեյ Լավրովը սկսել են քննարկել սիրիական քիմիական զենքը միջազգային վերահսկողությանը հանձնելու ռուսական նախաձեռնությունը:
«Սիրիայի դեպքում հազար տոննան լուրջ թիվ է: Դա շատ ավելին է, քան եղել է Լիբիայում, չնայած շատ ավելի քիչ է, քան ունեցել են ԱՄՆ-ը և Ռուսաստանը: Դա լուրջ մարտահրավերներ է առաջացնում՝ ոչ միայն այն առումով, ինչ վերաբերում է զորանոցին, այլ նաև… արտադրման միջոցների և մատակարարման»,- ասել է ԱՄՆ արտաքին գերատեսչության ներկայացուցիչը:
Պետդեպարտամենտի բարձրաստիճան պաշտոնյան նշել է, որ իրենք ունեն գնահատականներ, որոնք կկիսեն ռուսների հետ, և հույս է հայտնել, որ վերջիններս նույնպես նման կերպ կվարվեն, քանի որ անհրաժեշտ է խոսել այդ ծրագրի չափերի մասին:
Նրա խոսքերով՝ ԱՄՆ-ին անհանգստացնում են անվտանգության հարցերը՝ այն դեպքում, եթե հնարավորություն ստեղծվի քիմիական զենքը Սիրիայի սահմաններից դուրս բերել:
«Մենք ռուսներին առաջարկել ենք, որպեսզի նրանք պատրաստված գան: Շրջապատը ակնհայտորեն բարենպաստ չէ: Եթե ինչ-որ օբյեկտներ տեղակայված են վարչակարգի կողմից վերահսկվող տարածքում, դա ավելի հեշտ կլինի»,- ասել է նա:
