Թուրքական Sabah թերթի փոխանցմամբ, Թուրքիայում մահացել է 1980 թվականի ռազմական հեղաշրջման կազմակերպիչներից, ռազմական խունտայի և Ազգային անվտանգության խորհրդի նախկին անդամ, պաշտոնաթող ծովակալ Նեժաթ Թյումերը։
Վերջինս 1980-1983 թվականներին եղել է Թուրքիայի ռազմածովային ուժերի հրամանատարը։ Նրա անունը շոշափվում է 1980 թվականի սեպտեմբերի 12-ին Թուրքիայի Հանրապետության ավելի քան 87-ամյա պատմության ընթացքում տեղի ունեցած ամենաարյունալի ռազմական հեղաշրջման կազմակերպիչների թվում։
1983 թվականի դեկտեմբերի 6-ին ծովակալ Թյումերը սեփական ցանկությամբ լքել է ռազմածովային ուժերի հրամանատարի պաշտոնը։ 1980-1989 թվականներին Թյումերը հանդիսացել է Ազգային անվտանգության խորհրդի և Նախագահական խորհրդի անդամ։
Հիշեցնենք, որ Թուրքիայի Հանրապետության պատմության ընթացքում տեղի ունեցած այդ ամենաարյունալի ռազմական հեղաշրջման նախապատրաստման համապատասխան հիմքի ստեղծման համար ձախ և աջ արմատականների միջև հրահրված բախումներում մինչև հեղաշրջման առավոտ զոհվեց 2000 մարդ, հեղաշրջման արդյունքում բանտարկվեց 650,000 մարդ, ոստիկանությունում հարուցվեց 1,683,000 գործ, քաղաքական պատճառներով հարուցված 210,000 գործի շրջանակներում դատարանում հայտնվեց 230,000 մարդ, 517 մարդ ստացավ առավելագույն պատժաչափ, միևնույն ժամանակ այդպիսի պատժաչափը սպառնում էր 7,000 հոգու, 388,000 մարդ զրկվեց անձնագրից, աշխատանքից հեռացվեց մոտ 30,000 մարդ (նրանց ասացին, որ իրենք վտանգավոր են), որոնցից 20,000-ը ներկայացնում էին կրթական համակարգը, 14,000 մարդ զրկվեց քաղաքացիությունից, մոտ 30,000 մարդ փախավ երկրից, գրաքննության նկատառումներից ելնելով` արգելվեց 937 ֆիլմ, 400 լրագրողների առաջադրվեց 4,000 տարվա բանտարկության մեղադրանք, 300 օրվա ընթացքում թերթերը չհրապարակեցին հետաքննության մասին նյութեր, ոչնչացվեց 37,000 տոննա թերթ ու հանդես:
