Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցի համար առավել մտահոգիչ է Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի և թիկնապահի նկատմամբ քրեական հետապնդումը դադարեցնելու մասին «ակնհայտ ապօրինի որոշումը», քան այն, թե ինչպես կընթանա Զինծառայողների մահվան հարցերով հանձնաժողովի հետագա աշխատանքը: «Առաջին լրատվական»-ի հետ զրույցում Սաքունցը նշեց, որ դա պիտի հուզի նաև հանձնաժողովում մնացած անդամներին և ինքնին զինդատախազությանը: «Հանձնաժողովը, ցավոք սրտի, զրկվեց իր նշանակությունից. այստեղ կասկածի տեղ չկա, որ որևէ գործ, որի վերաբերյալ քրեական գործի հարուցումը կարճվել կամ կասեցվել է, կարող էր արժանանալ նույն ճակատագրին»,- ասաց նա: Սաքունցը հանձնաժողովի աշխատանքներին շարունակելու է հետևել, թեև արդեն` ոչ նրա կազմում, քանի որ, իր իսկ խոսքերով, զինդատախազության հետ համատեղ աշխատելու այդ մեխանիզմն արդեն իսկ կասկածելի է:
«Լրագրողներ հանուն մարդու իրավունքների» ՀԿ-ի նախագահ Ժաննա Ալեքսանյանը, ով նույնպես այլևս հանձնաժողովի աշխատանքներին չի մասնակցելու, նշեց, որ իրենք զոհված զինծառայողների ծնողների հետ հանդիպումներ ունեցել են: «Նախապես, երբ մենք մեր համաձայնությունը տվել էինք հանձնաժողովի աշխատանքներին մասնակցելու, հանդիպել ենք ծնողների հետ՝ նրանց, ովքեր տարիներ շարունակ հրապարակայնորեն բողոքում են: Ծնողներն այնքան էլ չէին վստահում հանձնաժողովին»,- ասաց Ալեքսանյանը: Նա նշեց, որ ինքը դեռ վերջնական պատասխան չէր էլ տվել` մտածելով, որ պետք է շատ հարցեր քննարկել վերջնական համաձայնության գալու համար: Ալեքսանյանն ընդգծեց. հրապարակային գործով զինդատախազը անում է հայտարարություն, այդ աղմկահարույց գործը ցույց է տալիս, թե այլ գործեր ինչ վիճակում կարող են հայտնվել: «Հանրությանն անտեսելու, կարծիքի վրա թքած ունենալու դեպքում չեմ կարծում, թե այլ գործերով բազմակողմանի ուսումնասիրություն կանեին: Սա ուղղակի հանրությանը, գործի մյուս կողմին անտեսելու հետևանք է: Կարծում եմ` զինդատախազն ուղղակի PR քարոզչություն էր ուզում անել այս հանձնաժողովի ստեղծումով»,- ասաց նա: Ալեքսանյանը նշեց, որ թե՛ իր, թե՛ Արթուր Սաքունցի կազմակերպությունները քրեական գործերով են զբաղվում, ապագայում ևս շարունակելու են զբաղվել այդ գործերով:
Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը և «Լրագրողներ հանուն մարդու իրավունքների» ՀԿ-ի նախագահ Ժաննա Ալեքսանյանը հայտարարություն են տարածել, որում մասնավորապես նշում են. «Հաշվի առնելով ՀՀ պաշտպանության նախարարության քննչական ծառայության կողմից Սյունիքի նախկին մարզպետ Սուրիկ Խաչատրյանի որդու՝ Տիգրան Խաչատրյանի և թիկնապահի նկատմամբ քրեական հետապնդումը դադարեցնելու մասին ակնհայտ ապօրինի որոշումը, որը կայացավ ՀՀ զինվորական դատախազ Գևորգ Կոստանյանի անմիջական ուղղորդմամբ և հսկողությամբ, հայտարարում ենք, որ անհնարին ենք համարում մեր հետագա գործունեությունը դեռևս աշխատանքները չսկսած՝ զինծառայողների մահվան հարցերով հանձնաժողովի կազմում»:
