TRT-ի ռուսական ծառայության փոխանցմամբ, Թուրքիայի ԱԳՆ-ն գրավոր շնորհակալություն է հայտնել Եգիպտոսի ղեկավարությանը՝ Գազայի հատվածում իրավիճակի կարգավորման հարցում մեծ ներդրում ունենալու համար.
«Թուրքիան հաճույքով ընդունեց Գազայի հատվածին սահմանակից «Ռաֆահ» անցակետի բացման մասին եգիպտական ղեկավարության որոշումը։ Մենք հավատում ենք, որ «Ռաֆահ» անցակետի բացումը կծառայի Գազայի հատվածում բնակվող ժողովրդի կենցաղային բարդ պայմանների մեղմացմանը։
Հուսով ենք, որ այդ քայլն Իսրայելին կստիպի վերանայել իր դիրքորոշումը Գազայի հատվածի նկատմամբ իրականացվող հակամարդկային շրջափակման հարցում։
Թուրքիան Եգիպտոսի ղեկավարությանը շնորհակալ է նաև Պաղեստինում ազգային համաձայնության ձեռքբերման հարցում ունեցած ներդրման համար»։
Հիշեցնենք, որ այն բանից հետո, երբ 2006 թվականին Գազայի հատվածում իշխանության եկավ «ՀԱՄԱՍ» խմբավորումը, Իսրայելը սկսեց ցամաքային և ծովային շրջափակման ենթարկել այն։
Իսկ երբ 2007 թվականին Գազայի հատվածն ամբողջությամբ հայտնվեց «ՀԱՄԱՍ»-ի վերահսկողության տակ, Իսրայելի հետ ունեցած պայմանավորվածության համաձայն, Եգիպտոսի նախկին նախագահ Մուբարաքը սահմանափակումներ մտցրեց «Ռաֆահ» անցակետում՝ թույլատրելով միայն ուսանողների, գործարարների և հիվանդների ելումուտը։
