Եգիպտոսի նախկին նախագահ Հոսնի Մուբարաքն իր ռազմական և պետական 62-ամյա գործունեության ընթացքում կուտակել է մեկ միլիոն դոլարի չափով ունեցվածք,- երկուշաբթի օրը հայտարարել է երկրի նախկին նախագահի փաստաբան Ֆարիդ Ալ-Դիբը: Նա ընդգծել է, որ Մուբարաքի ամբողջ ունեցվածքն ու գումարները գտնվում են Եգիպտոսի տարածքում:
«Նախագահի ունեցվածքը, որը գնահատվում է վեց միլիոն եգիպտական ֆունտ (մոտ մեկ միլիոն դոլար.– 1in.am) կուտակվել է օրինական ճանապարհով նրա ռազմական և պետական ծառայության ժամանակ: Բացի դրանից Մուբարաքը անգամ մեկ դոլար չունի՝ ոչ երկրում, ոչ էլ դրանից դուրս»,- հայտարարել է Ալ-Դիբը:
Իրավապաշտպանը նաև հերքել է վերջին օրերին ԶԼՄ-ներում հայտնված այն լուրը, ըստ որի՝ նախկին նախագահին Շարմ Ալ-Շեյխի հոսպիտալից ցանկանում են տեղափոխել բժշկական այլ հաստատություն: «Հոսնի Մուբարաքը գտնվում է հոսպիտալի չորրորդ հարկի իր հիվանդասենյակում: Նա չի լքում սենյակը: Նրա կողքին միշտ գտնվում է իր կինը՝ Սյուզանը»,- ասել է փաստաբանը:
Նա նաև հայտարարել է, որ նախկին նախագահը սրտի հետ կապված լուրջ խնդիրներ ունի, և բժիշկները նրան արգելում են հեռուստացույց նայել ու թերթեր կարդալ, որպեսզի չվատացնեն նրա առողջական վիճակը:
Հիշեցնենք, որ շատ լրատվամիջոցներ Մուբարաքի հրաժարականից հետո խոսում էին տասնյակ միլիարդների հասնող ունեցվածքի մասին, որ պատկանում է Մուբարաքին և նրա ընտանիքին:
