ԲՀԿ առաջնորդ Գագիկ Ծառուկյանի հետ համագործակցության ցանկությունը շատերի համար դաժան ավարտ ունեցավ։ Գործարար-պատգամավորի հետ համագործակցությունը երբեք էլ միանշանակ դրական չընկալվեց, և շատ գործիչներ վտանգելով անգամ իրենց հեղինակությունը, անցած ճանապարհը գնացին այդ համագործակցությանը՝ վերջում կանգնելով կոտրած տաշտակի առջև։
ՀՀՇ վարչության նախագահ Արարատ Զուրաբյանն, օրինակ, ամենաշատ քննադատված գործիչներից է։ Սկսած ՀՀՇ-ի ներքին (Մարտի 1), վերջացրած արտաքին քաղաքականության (ԵԱՏՄ-ԵՄ) տեսլականով, Արարատ Զուրաբյանին քննադատեցին շատերը, այդ թվում՝ նախկին կուսակից Կարապետ Ռուբինյանը, ով մեզ հետ զրույցում ասել էր, թե վատ երազում անգամ չի պատկերացրել, որ մի օր ՀՀՇ-ն կհայտնվի «Ծառուկյան» դաշինքում։
Արարատ Զուրաբյանը ռեյտինգային ընտրակարգով առաջադրվել էր թիվ 4 ընտրատարածքում, բայց քիչ ձայներ հավաքելու պատճառով մանդատ չստացավ։ Այս օրերին Զուրաբյանը խորը ընդհատակում է, հեռախոսազանգերին չի պատասխանում։ Կուսակցության գործադիր քարտուղար Կարեն Կարապետյանն էլ «Առաջին լրատվական»-ի հետ զրույցում ասաց, որ որևէ մեկնաբանություն այս հարցի առնչությամբ չունի։
Գագիկ Ծառուկյանի հետ համագործակցության փորձեր արեցին նաև զույգ հնչակյան կուսակցությունները։ ՎՍԴՀԿ ատենապետ Լյուդմիլա Սարգսյանը, նույնիսկ լրատվամիջոցներից մեկի հետ զրույցում նշել էր, որ Երևանի ավագանու ընտրություններում ինքը կարող է գլխավորել «Ծառուկյան» դաշինքի ավագանիների համամասնական ցուցակը։ Այսօր տիկին Սարգսյանը «Առաջին լրատվական»-ի հետ զրույցում պարզաբանեց. «Ինձ առաջարկություն է եղել կուսակցության կողմից՝ ներգավվել ավագանու համամասնական ցուցակում, և ես իմ համաձայնությունը տվել եմ։ Դրանից հետո եղել է հայտարարություն՝ չմասնակցության մասին: Դա է եղել թեմայի շուրջ մեր խոսակցությունը»։ Ինչ վերաբերում է կոնկրետ դաշինքի քաղաքապետի թեկնածու լինելուն, Լյուդմիլա Սարգսյանն արձագանքեց. «Նման բան չի ասվել՝ ինձ հարց է տրվել և ես ասել եմ, որ արժանի մարդիկ շատ կան ու իրենք կգտնեն արժանի մեկին, ով կգլխավորի ցուցակը»։
Մեր զրուցակիցը նշեց նաև, որ ավագանու ընտրություններում իրենց կուսակցության անդամները կքվեարկեն կամ «Ելքի» կամ «Երկիր Ծիրանիի» օգտին։ «Ես համարում եմ, որ երկուսն էլ արժանի են, որպեսզի առավելագույն ձայներ հավաքեն: Մենք ազատ ենք թողել ընտրությունը, մենք այսօր պարտավոր ենք ընդդիմադիր քաղաքական ուժերին աջակցել։ Իշխանությանը պաշտպանելու խնդիր չկա, առավել ևս, որ նա դրա կարիքը չունի՝ ունի բոլոր լծակներն ու հնարավորությունները․ մեր հիմնական գործը պետք է լինի ընդդիմադիր քաղաքական ուժերին աջակցելը»,- ասաց ՎՍԴՀԿ ատենապետը։
Սոցիալ-դեմոկրատ հնչակյան կուսակցությունը ևս տևական ժամանակ քննարկումներ էր անցկացնում Ծառուկյանի հետ՝ խորհրդարանական ընտրություններին դաշինքով մասնակցելու շուրջ։ Կուսակցության ատենապետ Նարեկ Գալստյանը օրերս բավականին սուր ելույթ ունեցավ՝ քննադատելով բոլոր ընդդիմադիր ուժերին ոչ գաղափարական դաշինքներ կազմելու համար։
«Առաջին լրատվական»-ի դիտարկմանը, թե «Ծառուկյան» դաշինքի հետ համագործակցությունը չստացվեց, Նարեկ Գալստյանն արձագանքեց. «Մենք աջակցել ենք ոչ միայն Ծառուկյանի, այլև այլ քաղաքական ուժերի հետ, և տեսնելով, որ իրենց օրակարգում ոչինչ չի փոխվել՝ համագործակցության ֆորմատից պարզապես դուրս ենք եկել։
Ծառուկյանի հետ անհաջող համագործակցության գնաց նաև Ռամկավար ազատական կուսակցությունը։ Տեղական կառույցի համար բավականին անակնկալ ձևով Ծառուկյանի խոսնակ Իվետա Տոնոյանը հայտարարեց, քանի որ կուսակցության տեղական և Սփյուռքի կառույցների մեջ կան տարակարծություններ՝ Ծառուկյանը նպատակահարմար չի գտնում շարունակել համագործակցությունը այս փուլում։ Իսկ հաջորդ փուլ այդպես էլ չեղավ։
«Միասնություն» շարժման ղեկավար Արման Վարդանյանը հայտարարում է, որ Ծառուկյանի հետ քաղաքական պայմանավորվածություն չի եղել։ Սակայն ինչպես հիշում ենք՝ ԲՀԿ նախկին ղեկավար Նաիրա Զոհրաբյանը հայտարարել էր, որ Երևանի ավագանու ընտրություններում «Ծառուկյան» դաշինքի քաղաքապետի ֆավորիտ թեկնածուն Արման Վարդանյանն է։ Վարդանյանը մեզ հետ զրույցում չէր էլ հերքել, որ հարցի շուրջ Ծառուկյանի և «Ծառուկյան» դաշինքի հետ քննարկումներ են գնում։ Թե ավելի ուշ ինչ սև կատու անցավ երկու գործիչների միջև՝ անհայտ է։ Մեր տեղեկություններով՝ վերջիններս առհասարակ դադարեցրել են շփումները։
Ի դեպ, «Ծառուկյան» դաշինքից մեկ այլ տուժած է նաև «Հայազն» կուսակցությունը, որն օրերս ՍԴՀԿ-ի հետ քաղաքական ընդհանուր հարթակ ստեղծեց։ Կուսակցության համակիրներից ազատամարտիկ և ընդդիմադիր գործիչ Մուշեղ Սաղաթելյանն, օրինակ, առաջադրվել էր Շիրակի մարզում՝ դաշինքի ռեյտինգային թեկնածուներից էր, սակայն շատ քիչ ձայն է հավաքել։ Մեր տեղեկություններով՝ Սաղաթելյանի ձայների մի մասը վերագրել են նույն ընտրատարածքի «Ծառուկյան» դաշինքի մեկ այլ թեկնածուի։
