Թանկացումների խնդիրը միայն Հայաստանին չէ, որ մտահոգում է. այն ամբողջ աշխարհում է: Այսօր լրագրողների հետ հանդիպմանը «Իրազեկ և պաշտպանված սպառող» ՀԿ նախագահ Բաբկեն Պիպոյանը նշեց, որ Եվրոպայում, օրինակ, մրցունակության խելահեղ ռիթմ է, ուստի գները հավասարակշռված են:
«Մեր խնդիրն այն է, որ այստեղ բալանս չկա: Քանի՞ անգամ եք լսել, որ կառավարությանը մտահոգի որևէ ապրանքի գնի բարձրացումը: Դրոշմակնքված գարեջուրը թանկացավ 30-40 դրամով՝ այն դեպքում, երբ դրանց համար վճարում են ընդամենը 2-3 դրամ, որն էլ պետությունը վերադարձնում է, բայց այդ նույն պետությունը ոչ մի անգամ չհետաքրքրվեց` ինչո՞ւ եք այդքան թանկացնում»,- ասաց նա:
Պիպոյանի խոսքով՝ արտադրողներ կան, ովքեր սպառողներից ստանում են մեծ գումարներ և մնում են անպատժելի: Կաթնամթերքի շուկան մենաշնորհված չէ, ուստի այստեղ թանկացումների դեմ պայքարելու համար չկա կամք և պրոֆեսիոնալիզմ:
Նա նկատեց, որ սպառողը չի կարող անգամ տարբերել տեղական լոլիկը ներմուծվածից, ասենք` թուրքականից: «Սննդամթերքի անվտանգության պետական ծառայությունը մեկ ամիս առաջ հայտարարեց, որ լաբորատոր հագեցվածության խնդիր ունենք: Իսկ ինչո՞ւ ունենք՝ դա առանձին հարց է, քանի որ պետությունը մասնավորից կարող էր պահանջել. նրանք ունեն նման սարքավորումներ: Այս հարցին պատասխան չկա, մնում է միայն տնտեսվարողի հետ աշխատել և հույսները դնել հանրային վերահսկողության վրա»,- ասաց նա:
Պիպոյանն անդրադարձավ նաև Մաքսային միությանը Հայաստանի անդամակցությանը: Նա նշեց, որ հասարակ քաղաքացիները տեղյակ չեն՝ ինչ է Մաքսային միությունը, ինչ` Ասոցացումը, չգիտեն, թե դրանցից յուրաքանչյուրն ինչ է տալու, ինչ է վերցնելու:
«Ընդհանուր իմաստով գիտենք, որ Եվրոպան լավ բան է, Մաքսային միությունն էլ մոտավորապես գիտենք, բայց դեռ պիտի հասկանանք: Այսուհանդերձ՝ եթե մենք ունենանք մրցունակ արտահանման ապրանք, մի՞թե Եվրոպան պիտի ասի՝ չէ, դուք ՄՄ անդամ եք: Կարևոր է, որ մեր արտադրանքը մրցունակ լինի շուկայում: Իրականում դա քաղաքական խնդիրներ է լուծում»,- ասաց նա:
Պիպոյանի խոսքով` ուրախությամբ բարձրաձայնում ենք, որ ՀՀ-ում անասնագլխաքանակն աճել է, մինչդեռ զարգացող երկրներում այն նվազում է, իսկ արդյունքում նրանք ստանում են բարձր յուղայնության կաթ, մշակում են պանրի բարձրորակ տեսականի, իսկ մեզ մոտ այդ ոչ բարձրորակ կաթից շատ բան ստանալ չի լինում:
Պիպոյանը չի հավատում, որ ԵՄ-ին անդամակցելով` կբարձրանար մեր արտադրանքի որակը: Նրա խոսքով` Հայաստանը վաղուց արդեն պիտի եվրոպական համակարգը ներդրած լիներ, և իրավազոր մարմինը կարողանար գնալ և տուգանել համակարգը չներդրածին: «Քանի՞ հոգի գիտեք, որ ներդրել են այդ համակարգը: Այո, թղթով ունենք, որ կա նման համակարգ: ԵՄ-ն ապրանքներ ունի, որ ներքին շուկայում չի սպառվում, սակայն անվտանգությունը հավաստող փաստաթղթով պիտի գա այստեղ»,- ասաց նա` հավելելով, որ դեռ հարց է` Եվրոպայից Հայաստան ներկրվող ապրանքը կլինի որակյա՞լ, թե՞ հակառակը:
