Ռուսաստանի նախագահ Վլադիմիր Պուտինը շնորհակալություն է հայտնել Գերմանիայի կանցլեր Անգելա Մերկելին Սոչի այցելության համար: Ինչպես հաղորդում է RIA Novosti-ն, Պուտինը կանցլերի հետ քննարկել է G20 գագաթնաժողովի նախապատրաստական աշխատանքները, ինչպես նաև Սիրիայում և Ուկրաինայում ստեղծված իրավիճակը:
«Մենք քննարկել ենք միջազգային խնդիրներ, այդ թվում՝ սիրիական ճգնաժամը և Ուկրաինայի իրավիճակը»,-ասել է Պուտինը:
Պուտինի խոսքով՝ Ռուսաստանը ձգտում է Գերմանիայի հետ հարաբերությունները կառուցել փոխադարձ շահերի, հարգանքի և իրավահավասարության հիման վրա:
Խոսելով ուկրաինական ճգնաժամի մասին՝ Պուտինն ընդգծել է, որ ոչ մեկ Դոնբասը չի առանձնացրել Ուկրաինայից: ՌԴ նախագահի խոսքով՝ դա անում են ուկրաինական իշխանությունները շրջափակման միջոցով:
Գերմանիայի կանցլերն իր հերթին հայտարարել է, որ Ուկրաինայում հակամարտության կարգավորումն էական նշանակություն ունի:
«ԵԱՀԿ-ի աշխտանքը հսկայական նշանակություն ունի և, իհարկե, տխուր է, որ մարդիկ, որոնք կողմ են հակամարտությունների դեէսկալացիային, դարձել են այդ հակամարտությունների զոհեր: Պետք է անենք ամեն ինչ, որպեսզի լուծենք այդ խնդիրը: Ցավոք, առաջընթաց առայժմ չկա»,-ասել է Մերկելը՝ հույս հայտնելով, որ Ռուսաստանի դեմ պատժամիջոցները կչեղարկվեն Մինսկի համաձայնագրերի պայմանները կատարելուց հետո:
Անդրադառնալով սիրիական հակամարտությանը՝ Մերկելն ասել է, որ Պուտինի հետ բանակցություներում հայտարարել է Սիրիայում հրադադարին աջակցելու և ահաբեկչության դեմ պայքարում սերտ համագործակցության պատրաստակամության մասին: «Մենք միասնական ենք միջազգային ահաբեկչության դեմ պայքարում: Այստեղ Գերմանին և Ռուսաստանը կարող են ավելի սերտ համագործակցել»,-հավելել է նա:
