ՀՀ քննչական կոմիտեի հատկապես կարևոր գործերով քննության գլխավոր վարչությունում հարուցվել է քրեական գործ Դանիել Իոաննիսյանի անձնական և ընտանեկան գաղտնիք համարվող տեղեկությունները ապօրինի հավաքելու և լրատվության միջոցներով տարածելու դեպքի առթիվ:
Հիշեցնենք, որ նախընտրական շրջանում, երբ Դանիել Իոաննիսյանի ղեկավարությամբ գործող «Իրազեկ քաղաքացիների միավորում» ՀԿ-ն հրապարակեց մանկապարտեզների և դպրոցների տնօրենների ձայնագրությոնները, մի քանի օր անց «Իրավունք» թերթում հոդված հայտնվեց, որն ամբողջությամբ վերաբերում էր Դանիելի ընտանիքին ու անձնական տեղեկություններ էր պարունակում: Հոդվածի տպագրությունից հետո Դանիել Իոաննիսյանը դիմել էր Հատուկ քննչական ծառայություն, քանի որ, իր պնդմամբ, այդ տեղեկություններին տիրապետում էին միայն ոստիկանությունը ու քննչական կոմիտեն, և միայն իրենք կարող էին այդ տեղեկությունները հանրային դարձնել: Բայց այսօր պարզվում է, որ քրգործ է հարուցվել ոչ թե ՀՔԾ-ում, այլ Քննչական կոմիտեում:
«Ես դիմել էի Հատուկ քննչական ծառայություն, քանի որ այդ կառույցը զբաղվում է այն գործերով, որոնք վերաբերում են պետական պաշտոնյաներին: Այդ տեղեկությունները «Իրավունք» թերթին փոխանցել են կա՛մ ոստիկանության աշխատակիցները, կա՛մ քննչական կոմիտեի աշխատակիցները, քանի որ այդ տեղեկությունները ամբողջ ծավալով միայն իրենք ունեին: Իսկ հիմա չգիտեմ, թե քննչական կոմիտեն քրգործ հարուցել է որ ինչ անի, քանի որ շատ հնարավոր է՝ հենց քննչական կոմիտեից են այդ տեղեկությունները փոխանցել «Իրավունք» թերթին: Հիմա քննչական կոմիտեն պատժելու է ինքն իրե՞ն: Լուրջ չի»,- «Առաջին լրատվական»-ի հետ զրույցում ասաց Իոաննիսյանը:
Դանիել Իոաննիսյանի խոսքով՝ քրեական գործը հարուցվել է ՔԿ-ում, որպեսզի այդպիսով փորձ արվի պետության վրայից, իրավապահ մարմինների վրայից մեղքը բարդել այլ տեղ, այլապես գործը կհարուցվեր հենց ՀՔԾ-ում:
Դանիելը բացառում է, որ ոստիկանության ծառայողներից ու քննչական կոմիտեի քննիչներից բացի՝ որևէ երրորդ անձ ևս տիրապետեր իր անձնական կյանքին վերաբերող տեղեկություններին:
«Ես բացառում եմ: Այդ տեղեկությունները ամողջ ծավալով միայն այդ երկու գերատեսչությանն էին հայտնի: Ես անձամբ տեղյակ չէի որոշ մանրամասների: Կարդալուց հետո ինձ համար շատ նոր բաներ են հայտնի դարձել: Գործը եղել է միայն քննչական կոմիտեի արխիվում: Եվ միայն տեսականորեն կարելի է պատկերացնել, որ «Իրավունք» թերթը եկել մտել է ՔԿ-ի արխիվ ու իմ մասին թղթեր է գողացել, դա խելքին մոտ չէ»,- նկատեց Իոաննիսյանը:
Նա նշեց, որ դեռ որևէ ծանուցում չի ստացել, թե ՔԿ-ում գործ է հարուցվել: Այդ մասին իմացել է միայն լրատվամիջոցներից: Ծանուցում ստանալուց հետո միայն փաստաբանների հետ կքննարկի իր հետագա անելիքները:
