Թվում է` ԵՄ-ի հետ Ասոցացման պայմանագրի տապալումից հետո առաջինը պետք է համապատասխան գնահատականով և հայտարարությամբ հանդես գար ԱԺ Եվրաինտեգրման հանձնաժողովը: Սակայն այսօր գրեթե բոլոր քաղաքական, տնտեսական, քաղաքացիական ուժերը տեսակետ ու գնահատական են հայտնում, բացի ԱԺ Եվրաինտեգրման հարցերի հանձնաժողովից: Պատճառը միգուցե նաև այն է, որ Եվրաինտեգրման հանձնաժողովի ղեկավարները` նախագահն և տեղակալը, ԲՀԿ-ական են, իսկ ԲՀԿ-ն չի թաքցնում, որ պրոռուսական ուժ է: Ներկայացնում ենք Եվրաինտեգրման հանձնաժողովի փոխնախագահ, ԲՀԿ-ական Վահե Էնֆիաջյանի հետ «Առաջին լրատվական»-ի զրույցը:
– Որպես Եվրաինտեգրման հարցերով հանձնաժողովի փոխնախագահ` կուզեի իմանալ Ձեր տեսակետը ԵՄ Ասոցացման պայմանագրի և Մաքսային միությանը միանալու որոշման վերաբերյալ: Արդյոք սա լուրջ ձախողում չէ՞ր` հատկապես եվրաինտեգրման մասով:
– Մենք նման գնահատական չենք տա: Անցած շաբաթ մեր հանձնաժողովը նիստ է գումարել, որտեղ նաև քննարկվել են այդ հարցերը, և մենք կարևորել ենք, որ ոլորտի ղեկավարներն ու պատասխանատուները անպայման խորհրդարանում հանդիպեն պատգամավորների հետ և ընդհանուր գործընթացի վերաբերյալ լուսաբանեն: Իսկ ընդհանուր գործընթացի շուրջ մենք գտնում ենք, որ մասնագետներ, տնտեսագետներ պետք է շատ հստակ, ավելի մանրակրկիտ ձևաչափով վերլուծելով իրականությունը` մանրամասնեն, թե ինչ կտա այս կամ այն ձևաչափին անդամակցությունը, և այս գործընթացները ուր են տանելու: Այս վերլուծությունները ոչ միայն ԱԺ պատգամավորի համար, այլև մեր քաղաքացիների համար շատ կարևոր են, որ հասկանալի լինի այս գործընթացներն ուր են տանում:
– Իսկ ո՞րն է Ձեր տեսակետը` եվրաինտեգրում մեզ պե՞տք էր, թե՞ միայն Ռուսաստանի հետ հարաբերություններն են պետք:
– Մենք գտնում ենք, որ այս հարցի շուրջ բավականին ճկուն քաղաքականություն պետք է վարել: Մենք ՌԴ-ի և ԱՊՀ պետությունների հետ լավ տնտեսական հարաբերությունների մեջ ենք գտնվում, միևնույն ժամանակ մենք եվրոպական մեծ ընտանիքի հետ առաջին քայլերը` որպես այդպիսին արել ենք: Եվ առաջիկա զարգացումներն ու վերլուծությունները ցույց կտան, թե մենք ինչ ընթացք ենք ունենալու այս ուղղություններով:
– Պարոն Էնֆիաջյան, Եվրոպան հստակ հայտարարեց, որ հնարավոր չէ այլևս Ասոցացման պայմանագիրը: Ի՞նչ քննարկման և ի՞նչ բացատրությունների մասին է խոսքը:
– Ես չեմ կարծում, որ անդառնալի ինչ-որ մի իրավիճակում է գտնվում Հայաստանը: …Մի բան կարող եմ ասել, որ պետք է մասնագետները շատ խորը վերլուծեն, ուսումնասիրեն և հրապարակեն: Ամբողջը հասարակության աչքի առաջ լինի այս գործընթացը:
– Դուք էլ եք մասնագետ, հանձնաժողովի փոխնախագահ, ո՞րն է Ձեր տեսակետը:
– Որպես հանձնաժողովի ներկայացուցիչ` ասում եմ, որ միանշանակ եվրոպական գործընթացներ կան, որոնցով մենք պետք է զարգացում ապրենք և կապրենք:
– Պարոն Էնֆիաջյան, Եվրոպան հստակ ասում է` վերջ: Այսօր տարբեր քաղաքական, տնտեսական, քաղաքացիական դիրքորոշումներ են հնչում, ինչո՞ւ Եվրաինտեգրման հանձնաժողովը որևէ դիրքորոշում չի հայտնում այդ առթիվ: Արդյոք հանձնաժողովի նախագահի և Ձեր ԲՀԿ-ական լինե՞լն է նաև կաշկանդում:
– Մեզ ոչինչ չի կաշկանդում: Մեր հանձնաժողովը նիստ է կազմակերպել, որտեղ շատ հստակ քննարկել է, և որոշվել է, որ խորհրդարան պետք է հրավիրվեն ԱԳ նախարարը և ոլորտի այլ պատասխանատուներ, որոնք կմանրամասնեն և կպարզաբանեն:
– Սակայն դա տեսակետ չէ, պարոն Էնֆիաջյան:
– Դա շատ հստակ տեսակետ է:
– Իսկ Եվրաինտեգրման հանձնաժողովը պատրաստվո՞ւմ է հանրային լսումներ կազմակերպել այս հարցի շուրջ:
– Մենք բոլոր գործընթացներում կողմնակից ենք, որ դրանք անցնեն թափանցիկ և հանրությանը տեսանելի իրավիճակում: Մենք ինքներս շատ հարցերում նախաձեռնող ենք, բայց լիազորությունները գտնվում են այլ դաշտում, որ նման գործընթացներ կազմակերպվեն: Կարծում եմ` պետք է շահագրգռված լինեն բոլոր քաղաքական ուժերը, որ անցնեն թափանցիկ ու հանրության աչքի առջև:
