Գյումրիի նախկին քաղաքապետ, Շիրակի մարզում «Ծառուկյան» դաշինքի ռեյտինգային ցուցակով առաջադրված Վարդան Ղուկասյանը հայտարարել է, որ ապրիլի 2-ին անցկացված խորհրդարանական ընտրությունների արդյունքում ինքը կորցրել է ավելի քան 3 հազար քվե։ Ղուկասյանի գրասենյակի տարածած հայտարարության մեջ նշվում է, որ ինքը ստացել է ավելի քան 15.000 քվե, բայց մոտ 3 հազարը վերագրել են այլ թեկնածուների. «Ընտրական նոր տեխնոլոգիաների պատճառով մենք կորցրել ենք ավելի քան երեք հազար ձայն: Մենք բոլորս ավելի քան վստահ ենք, որ մեր հավաքած ձայների քանակը հատում է տասնհինգ հազար ձայնը, բայց մենք մեծահոգաբար ենք վերաբերվում ձայների այդպիսի տեղաբաշխմանը և հույս հայտնում, որ մյուս թեկնածուները, ում օգտին հաշվարկվել են մեր ձայները, քաջ գիտակցում են դա և ևս շնորհակալ են մեզանից»,- ասված է հայտարարության մեջ։
Վարդան Ղուկասյանը, սակայն, չի հստակեցնում, թե իր հնչեցրած մեղադրանքներն ում են ուղղված, ով է գողացել իր ձայները՝ իշխանակա՞ն թեկնածուները, թե՞ ուրիշը:
Շիրակի մարզի ՀՀԿ կառույցի պատասխանատու Սահակ Մինասյանն «Առաջին լրատվական»-ի հետ զրույցում ասաց, որ իրավասություն չունի պատասխանելու, արձագանքելու Ղուկասյանին: Ղուկասյանի հայտարարությանը պետք է արձագանքեն ընտրատարածքային ընտրական հանձնաժողովները:
«Ամեն դեպքում կարող եմ ասել, որ ընտրատարածքային ընտրական հանձնաժողովները նման բան չէին կարող թույլ տալ: Եվ հետո ձայների շփոթ կարող էր առաջանալ միայն ներկուսակցական մակարդակում, այն էլ, լավագույն դեպքում, մեկ-երկու ձայնի տարբերությամբ: Իսկ ՀՀԿ-ի ձայները բավարար էին, մի բան էլ ավելի, որպեսզի ուրիշ թեկնածուի ձայներ գողացվեր»,- ասաց Մինասյանը:
Անդրադառնալով Շիրակի մարզում ՀՀԿ-ի գրանցած արդյունքներին՝ Մինասյանն ասաց, որ ժողովուրդը տվել է այնքան ձայն, ինչքան հարմար է գտել: «Իհարկե, մենք նախանշում էինք, որ ավելի շատ ձայն պետք է ստանայինք, բայց ունենք այն, ինչ ունենք, նորմալ է, շնորհակալության ժողովրդին մեր հանդեպ ունեցած վստահության համար»,- ասաց Շիրակի մարզի ՀՀԿ պատասխանատուն:
Մեր դիտարկմանը, թե ինչի վրա հիմնվելով հույս ունեին, որ ավելի շատ ձայն պետք է ստանային, երբ Շիրակի մարզում, Գյումրիում համատարած աղքատություն է, մարդիկ շուրջ երեք տասնամյակ տնակներում են ապրում, Մինասյանն արձագանքեց. «Ընդհանարապես, երբ խոսում ենք պետականաշինության մասին, անկախության պահպանման, երկրի զարգացման մասին, երբ երկրում հիմնվում է կառավարման նոր մոդել, որը էականորեն տարբերվում է հին մոդելից, նոր ճանապարհներ է բացում, ապա այդ գլոբալ տիրույթում Սյունիքում, թե Շիրակի մարզում ինչպիսին է վիճակը, շատ քիչ է կարևորվում: Բնականաբար մեր մարզը առանձնանում է, քանի որ աղետ է տեսել, բայց քվեարկության ժամանակ մեր ժողովուրդը անձնական խնդիրներից վեր է կանգնել և շատ ավելի իմաստուն է գտնվել: Մեր ժողովուրդը գնաց քվեարկության և կարևորեց երկրի առաջընթացի և զարգացման հիմնահարցը բոլոր այլ հարցերից»:
