Քվեարկությունից օրեր անց մենք հետընտրական գործընթացի շատ կարևոր փուլում ենք, ժամանակն է տեսնելու, թե ինչ կարգավորում են ստանում տարբեր դերակատարների կողմից ներկայացված բողոքները: Այս մասին «Առաջին լրատվական»-ի հետ բացառիկ հարցազրույցում նշել է Հայաստանում ԵՄ պատվիրակության ղեկավար, արտակարգ և լիազոր դեսպան Պյոտր Սվիտալսկին՝ անդրադառնալով ապրիլի 2-ին Հայաստանում տեղի ունեցած խորհրդարանական ընտրություններին:
«Ժամանակն է շատ ուշադիր, շատ հանգիստ վերլուծելու բոլոր ապացույցները, բոլոր փաստաթղթերը և մեր ունեցած այլ վկայությունները։ Շնորհիվ Եվրոպական միության, ես կարծում եմ՝ Հայաստանի անկախ պատմության մեջ առաջին անգամ մենք ունենք հնարավորություն՝ ուսումնասիրելու քվեարկության ընթացքում հավաքված բոլոր ապացույցները, հնարավորություն ունենք վերլուծելու գրանցված ընտրողների ցուցակը, հնարավորություն ունենք ուսումնասիրելու տեսախցիկների արած տեսագրությունները, ունենք հնարավորություն ուսումնասիրելու մնացած բոլոր վկայությունները՝ ներառյալ նրանք, որոնք հավաքվել են միջազգային քաղաքացիական հասարակության աննախադեպ մեծ թվով դիտորդների կողմից,- ասաց դեսպանը՝ հավելելով. «Ոչինչ վերջնական չէ, ո՛չ մի գնահատական, ո՛չ մի եզրակացություն վերջնական չէ, մինչև ամբողջական պատկերը չունենանք։ Հիմա, երբ քաղաքական կրքերը հանդարտվում են, կարծում եմ՝ այս անգամ առնվազն Եվրամիության համար, որն այնքան շատ ներդրում է ունեցել քաղաքական ջանքերի և ֆինանսի առումով, ժամանակն է ունենալ ամբողջական պատկերն առ այն, թե ինչ է տեղի ունեցել առաջ և ընտրությունների օրը»։
Հայաստանում ԵՄ պատվիրակության ղեկավար Պյոտր Սվիտալսկու հետ ամբողջական հարցազրույցը՝ ավելի ուշ
