Այսօր «Ղարաբաղ» կոմիտեի անդամ Աշոտ Մանուչարյանից փորձեցինք պարզել, թե որը պետք է լինի քաղբանտարկյալների ազատ արձակումից հետո ՀԱԿ-ի հաջորդ քայլը, ինչին ի պատասխան ասաց.
«Ասում են, թե Բարձրյալը մարդուն տվել է կամքի ազատություն, այդ թվում` նաև երևի թե քաղաքական ուժերին: Ամեն մի քաղաքական ուժ ինքն է տնօրինում, թե ինքը ինչ անի և ինչպես անի: Ես կարող եմ ասել, թե ինչպիսի առաջնային խնդիրներ են ծանրացել երկրի առջև: Մեր կարևորագույն խնդիրը երկրի անկախությունն է, որի օրն է այսօր: 88-ից սկսած դա անկախության գործընթաց չէր, բայց կամաց-կամաց ձեռք բերեցինք իրական անկախությանն ուղղված մի շարք բնութագրեր, որը հետագայում կորցնելու էինք: Այս տեսակետից առաջնային է այդ անկախության ձեռքբերումը: Այն իր հերթին ունի երկու հարթություն: Մեկն այն է, որ մենք ապրում ենք խորթ արժեհամակարգում:
Այնինչ՝ անկախությունը ֆունդամենտալ հարց է, որը նաև սկիզբ է հանդիսանում ազատության համար: Բայց այդ, խորքային որակների ձեռքբերումը երևի թե շատ դժվար կլինի մեր քաղաքական ուժերի համար, որովհետև շատ-շատերը նրանցից այս հարթության մեջ անգամ հակառակ դիրքերից են հանդես գալիս: Ոչ միայն կրողը չեն այս արժեքների, այլ պաշտպանն են և ներկրողը այլ արժեքների: Իսկ ինչ վերաբերում է մյուս անկախությանը` դա քաղաքական է, նեղ իմաստով քաղաքական անկախության ձեռքբերումն է, որը ավելի հասանելի է: Արտաքին ազդեցության և արտաքին ներմուծման մեխանիզմների ոչնչացումը, կազմաքանդումը և սեփական ինքնակազմակերպման մեխանիզմների կազմակերպումն այսօր ռացիոնալ խնդիր են: Եվ կարծում եմ` քաղաքական ուժերն առաջին հերթին պետք է հետամուտ լինեն այս հարցին: Այս հարցի շրջանակում իրոք շատ մեծ դեր կխաղա Մարտի 1-ի ամբողջ տրամաբանության բացահայտումը: Բայց դա նախնական քայլ է, շարունակությունն ավելի բարդ է և ավելի ծավալուն»,- եզրափակեց Աշոտ Մանուչարյանը:
