«Ելք» դաշինքի անդամները վստահեցնում են, որ խորապես գիտակցում են իրենց վրա դրված պատասխանատվության աստիճանը, Ազգային ժողովում ՀՀ քաղաքացու շահերը ներկայացնելու և դրանց իրացման համար պայքարելու առաքելությունը: Նրանք խոստանում են լինել հաշվետու և հասանելի ՀՀ քաղաքացու համար: «Ֆեյսբուք»-ի իր էջում նման գրառում է կատարել «Ելք» դաշինքի առաջնորդ, «Լուսավոր Հայաստան» կուսակցության նախագահ Էդմոն Մարուքյանը:
«Սիրելի հայրենակիցներ, ցանկանում եմ իմ խորին շնորհակալությունը հայտնել «ԵԼՔ» դաշինքի այն բոլոր ընտրողներին, ովքեր իրենց քվեն վստահել են մեզ՝ գնահատելով նախորդ 5 տարիների ընթացքում կատարված աշխատանքը, ցանկանալով ավելացնել մեր տեսակը Ազգային ժողովում, հավատալով փոփոխությունների հնարավորությանը:
Անձամբ իմ, և «ԵԼՔ» դաշինքի ապագա խմբակցության անունից, վստահեցնում եմ, որ մենք խորապես գիտակցում ենք մեր վրա դրված պատասխանատվության աստիճանը, ԱԺ-ում ՀՀ քաղաքացու լավագույն շահերը ներկայացնելու և դրանց իրացման համար պայքարելու մեր առաքելությունը:
Խոստանում ենք լինել հաշվետու և հասանելի ՀՀ քաղաքացու համար»,- գրել է Էդմոն Մարուքյանը:
