Լոս Անջելեսում դատավորը մերժել է ռեժիսոր Ռոման Պոլանսկու՝ բռնաբարության գործի կարգավորման մասին միջնորդությունը։ Այս մասին հայտնում է AP գործակալությունը։
Ավելի վաղ Պոլանսկու իրավաբանական թիմը դիմել էր ԱՄՆ դատարան՝ անչափահաս աղջկա բռնաբարության գործի կարգավորման միջնորդությամբ։ Դեպքը տեղի էր ունեցել մոտ 40 տարի առաջ։ Ռեժիսորի փաստաբան Հարլանդ Բրաունը հայտարարել էր, որ 83-ամյա Պոլանսկին, ով ունի Լեհաստանի և Ֆրանսիայի քաղաքացիություն, ծրագրում է վերադառնալ ԱՄՆ՝ այցելելու կնոջ՝ Շարոն Թեյթի գերեզմանին, ով սպանվել էր 1969 թվականին Չարլզ Մենսոնի ավազակախմբի կողմից։ Ռեժիսորին պետք են երաշխիքներ, որ ինքը չի հայտնվի բանտում՝ բռնաբարության մեղադրանքով։
Լոս Անջելեսի գերագույն դատարանի դատավոր Սկոտ Գորդոնը մերժել էր գործի կարգավորման մասին մի քանի հայցեր, այդ թվում բանտարկությունը բացառող։ Գորդոնը նաև հրաժարվել էր հստակեցնել, թե ինչպիսին կլինի Պոլանսկու դեմ վճիռն այն դեպքում, եթե նա վերադառնա ԱՄՆ։
