Հայաստանի ագրարագյուղացիական միության նախագահ Հրաչ Բերբերյանն ամեն օր շփվում է գյուղացիների հետ, ովքեր դժգոհ սոցիալական պայմաններից ու մթերվող ապրանքների ցածր գնից՝ ստիպված լքում են գյուղը: Նման մտահոգություն նա հայտնեց «Առաջին լրատվական»-ի հետ զրույցում՝ անդրադառնալով սեզոնային մթերումներից ունեցած գյուղացիների դժգոհություններին:
«Զարմանում եմ, որ շուկայական հարաբերություններում կողմնորոշվում են թվերով, այլ ոչ՝ շուկայական գներով: Անցած տարվա համեմատ բանջարեղենի որոշ տեսակներ թանկացել են 30, մինչև անգամ 100 տոկոսով: Լուրջ խնդիր ունենք հատկապես լոլիկի հետ: Եթե, օրինակ, սմբուկը թանկացել է 30 տոկոսով, ապա լոլիկը՝ մոտ կրկնակի»,- ասաց Հրաչ Բերբերյանը:
Անդրադառնալով գյուղմթերրքի մթերման՝ այս տարի գրանցված բարձր ցուցանիշներին՝ նա հատկանշական համարեց, որ որոշ լրատվամիջոցներ խիստ ուռճացված թվեր են մատուցում հանրությանը: «Կան լրատվամիջոցներ, որոնք, եթե չասենք կաշառված են, ապա գտնվում են որոշ օլիգարխների, արդյունաբերողների ազդեցության ներքո և, բնականաբար, այս հարցում օբյեկտիվ մոտեցում չեն կարող ցուցաբերել: Հայաստանում այս տարի հաջող է եղել հատկապես ծիրանի բերքը: Սակայն այս դեպքում ևս արդյունաբերողները փորձեցին իջեցնել գյուղացու բերքի գինը, թալանել ֆերմերներին: Պարզ է, թե այս կերպ ում ջրաղացին է ջուր լցվում»,- ասաց նա:
Խոսելով խաղողի մթերման ցուցանիշների մասին՝ Հայաստանի ագրարագյուղացիական միության նախագահը նկատեց, որ այս պահի դրությամբ խաղողի մթերման ցուցանիշները չեն գերազանցում անցած տարվա տվյալները: «Քանի որ չկան համապատասխան օրենքներ ու լծակներ, քանի որ գյուղացին օրենքով պաշտպանված չէ, ապա օլիգարխները կշարունակեն թալանել գյուղացուն: Հետևանքն այն է, որ գյուղը դատարկվում է»:
Ամփոփելով՝ Հրաչ Բերբերյանը նկատեց, որ քիչ չեն դեպքերը, երբ գյուղից բացակայողի հողերը վարձակալության հիմունքներով տրվում են մեկ այլ գյուղացու, ով էլ ցանկություն ունենալով ընդլայնել սեփական ցանքատարածությունները՝ ամսավճարով օգտագործում է դրանք:
